Мурат Гассиев ниҳоят қайтмоқда, у жанг санасини эълон қилди

Россиялик боксчи катта танаффусдан сўнг, ниҳоят 30 сентябрь куни ўз жангини ўтказади.

"Ҳаммага салом! Ниҳоят, ўқув-машғулот йиғинини ўтказиш учун Туркияга етиб келдик. Яхши янгиликлар бор: кейинги жангим 30 сентябрь куни бўлиб ўтади. Ҳаммага омад! Биз эса тайёргарликни давом эттирамиз", — дея ўзининг ижтимоий тармоқдаги саҳифаси орқали янгиликни улашган Гассиев.

Аввалроқ Гассиевнинг рақиби катта эҳтимол билан швециялик Отто Валлин (25-1, 14 KO) ёки конголик Мартин Баколе (19-1, 14 KO) бўлиши мумкинлиги айтилганди. Тез кунда 29 ёшли Муратнинг рақиби расман маълум қилинади. Гассиев 2016 йилнинг декабрида ҳамюрти Денис Лебедевни мағлуб этиб, IBF чемпионлик камарини қўлга киритган. 2018 йилнинг февралида эса кубалик Юниер Дортикосдан WBA камарини тортиб олганди. У фаолиятидаги ягона мағлубиятини супероғир вазн тоифасида учта асосий камар соҳиби бўлиб турган украиналик Александр Усикдан қабул қилиб олган.