Муроджон Аҳмадалиев баҳордаёқ рингга қайтмоқчи

Чарм қўлқоп устамиз шу йилнинг май ойида рингга қайтишни режалаштираётганини маълум қилди.

"Мен вариантларни ўрганяпман ва тез орада қарор қабул қиламан. Жуда катта эҳтимол билан май ойида рингга қайтаман, - деди 31 ёшли ўзбекистонлик боксчи The Ring нашрига берган интервьюсида. - Ўша жангда жиддий жароҳат олмаганим учун тезроқ рингга қайтишни истадим. Мен Иноуэ билан яна бир бор учрашишдан мамнун бўлардим, аммо унинг ҳимоя мажбуриятлари билан бу қийин масала".

"Албатта, мен бир қатор хатоларга йўл қўйдим, аммо энди бу муҳим эмас, - дея қўшимча қилди Аҳмадалиев Иноуэ билан жангни эслаб. - Гап-сўзлар ҳеч нарсани ўзгартирмайди. Ўшанда мен жангга қайта олмадим ва бу менинг айбим. Дунёнинг энг яхшиларидан бири билан жанг қилиш шараф ва катта сабоқ бўлди. Тан оламан, ўша оқшом Иноуэнинг ҳолати яхшироқ эди. Ажойиб жанг режаси, кучли интизом. У буни уддалади".

Ҳозирги ҳолатда Аҳмадалиев чемпионлик жангида рингга қайтишни хоҳлайди, шунинг учун ярим енгил вазн тоифасига кўтарилишга ҳам тайёр. Унга тезроқ рингга қайтиш муҳимроқ.

"Мен биринчи ярим енгил ёки ярим енгил даражадаги ҳар қандай жанглар учун очиқман - агар бу маънога эга бўлса, - деди Муроджон. - Мен камар учун жанг қилишни афзал кўрардим, лекин бу менинг қўлимда эмас. Matchroom компанияси билан яхши муносабатдаман, жамоам кейинги жанг устида ишламоқда. Менда ҳали кўп куч бор ва бокс мухлисларини хурсанд қилмоқчиман".