Муроджон Аҳмадалиев Даниель Романга қарши чемпионлик жанги олдидан матбуот анжуманида қатнашди

Бугун ҳар икки боксчи мазкур жанг олдидан матбуот анжуманида иштирок этди. 

Унда Муроджон Аҳмадалиев қуйидаги фикрларни билдирди:

"Ўзбек бокси доим профессионалликка яқин бўлган. Ҳаваскор боксда ҳисобимда 350 дан ортиқ жанг бор, уларнинг 100 дан ортиғи нокаут билан якунланган. Мен катта қўлқоплар билан рақибларга оғриқ беришни биламан. Мен доим профессионал услубга интилганман. Шунинг учун ҳам ушбу чорловга тайёрман. 

Режам - иккита камарни олиб, ушбу жангдан кейиноқ уйимга кетишдир. 

Ўзбекистонда бокс мухлислари кўп, худди Мексика сингари. Улар боксни бошқа спорт турларига қараганда кўпроқ яхши кўришади ва биз боксчиларни қўллаб-қувватлашади. Бизда ҳукумат томонидан ҳам қўллаб-қувватлов бор. Мухлисларимиз эса бизни дуо қилишади", - деди Муроджон Аҳмадалиев.