Муроджон Аҳмадалиев ЎзДЖТСУда талабалар билан учрашди + ФОТО

Тадбирда Олимпия ўйинлари совриндори Рустам Саидов, бокс бўйича терма жамоамиз аъзолари, университет профессор-ўқитувчилари, талабалар иштирок этди.

Маълумки, кўплаб спорт турлари бўйича Ўзбекистон терма жамоасининг аксарият қисмини Ўзбекистон Давлат Жисмоний тарбия ва спорт университети талабалари ташкил этишади. Ушбу ўқув юрти тарбияланувчилари терма жамоаларимизнинг негизини ташкил этади, десак ҳам муболаға бўлмайди.

Тадбирда илмий ишлар ва инновациялар бўйича проректор Рашид Маткаримов терма жамоаларимизда Токио Олимпиадасига олиб борилаётган тайёргарлик, спортчиларимизнинг лицензион мусобақаларга тайёрланиши учун ҳукуматимиз томонидан яратиб берилаётган шароитлар ҳақида гапириб берди. 

Учрашув давомида мамлакатимизда спортни ривожлантиришга қаратилаётган доимий эътибор ёшларимизнинг ҳар томонлама соғлом ва баркамол инсонлар бўлиб вояга етиши, халқаро майдонларда иқтидор ва салоҳиятини кенг намоён этишида муҳим аҳамият касб этаётгани таъкидланди.

Мамлакатимизнинг барча ҳудудида яратилган кенг имкониятлар туфайли спорт миллионлаб ёшларнинг севимли машғулотига айланди. Иқтидорли ёшлар ҳар томонлама қўллаб-қувватланиб, улар халқаро миқёсдаги нуфузли спорт мусобақаларида муносиб иштирок этмоқда. Юртимиз спортчилари жаҳон ва қитъа чемпионатлари, Олимпия ва Осиё ўйинларида юқори кўрсаткичларга эришаётир.

– Ҳозирги ёшларга ҳавас қиламан, – дейди Рустам Саидов. – Спорт билан шуғулланаман деган йигит-қизнинг орзуларини рўёбга чиқариш учун барча шароит ва имконият бор. Бундан ёшларимиз унумли фойдаланиши зарур.

Учрашувда Муроджон Аҳмадалиев ўз фаолияти, спортда эришган натижалари ҳақида батафсил сўзлаб берди. Шунингдек, яқиндан ёрдам бераётган устозларига хусусан, университет рахбариятига ўз  миннатдорчилигини изҳор этди.

– Бу каби учрашувлар спортчиларимизнинг ютуқларидан ибрат олиб, бугунги шароитларнинг қадрига етишга ундайди, – дейди Ўзбекистон давлат жисмоний тарбия ва спорт университети талабаси Жасурбек Эгамов. – Биз, ёшлар юксак эътибор ва ғамхўрликка жавобан бор куч ва билимимизни юрт равнақи учун сарфлашимиз лозим.

Президентимизнинг Муроджон Аҳмадалиевга йўллаган табригида таъкидланганидек, эл-юртимизнинг ишончини оқлаб, мустақил Ўзбекистон спорти тарихида мутлақо янги ва ёрқин саҳифа очган ушбу оламшумул зафар соҳиби бўлган Муроджон каби жасур ва ватанпарвар ўғлонларимиз билан ҳақли равишда фахрланамиз. 

ЎзДЖТСУ матбуот хизмати