Музаффар Абдураҳмонов: «Камтарона меҳнатимиз давлат мукофоти, пул, автомобиль, уй билан тақдирланди»

Мукофот олганлар орасида эркин кураш бўйича Ўзбекистон терма жамоаси аъзоси, Токио-2020 Олимпия ўйинларининг бронза медали совриндори Бекзод Абдураҳмоновнинг мураббийи Музаффар Абдураҳмонов ҳам бор. У Президент Фармонига кўра «Ўзбекистон Республикасида хизмат кўрсатган спорт устози» фахрий унвони мукофотига лойиқ кўрилди. 

«Аввало, Президентимиз Шавкат Миромоновичга биз спортчи ва мураббийларга кўрсатаётган эътиборлари учун барча спорт курашчилар оиласи номидан раҳмат айтмоқчиман. Биз учун кутилганидан ҳам аъло даражада ғамҳўрлик кўрсатилди. Камтарона меҳнатимиз давлат мукофоти, пул, автомобиль, уй билан тақдирланди. Бу спортчи ва мураббийларни янада руҳлантиради, янги ғалабалар сари ундайди. Очиғи, Бекзод билан Токио гиламларида олтин медални қўлга киритишни ният қилгандик. Энди бу спорт, унда шундай кутилмаган натижалар бўлиб туради. Айниқса, Олимпия ўйинлари бошқа мусобақалардан шуниси билан ҳам фарқланади. Насиб қилса, Париж-2024 Олимпиадасида олий орзуимизни рўёбга чиқарамиз. Бунинг учун астойдил ҳаракат қиламиз. Машғулотларни аллақачон бошлаб юборганмиз. Олдинда икки ойдан сўнг ўтказиладиган жаҳон чемпионати, келаси йили Хитойда ўтажак Осиё ўйинлари бор. Бу мусобақаларда ҳам фақат чемпионлик учун курашамиз», - дейди Музаффар Абдураҳмонов.