Нганну UFC билан янги шартнома имзолаш шартини айтди

Нганну 22 январь куни Анахаймда бўлиб ўтадиган UFC 270 турнирида Сирил Ганга қарши октагонга кўтарилади. Ушбу жангдан сўнг Нганну ташкилот билан янги шартнома имзолайди. Фақат бунинг учун келишувда профессионал боксда ўзини синаб кўриш имконини берувчи банд бўлиши лозим. 

"Тайсон Фьюри, Деонтей Уайлдер – мен ўзимни шу даражада синаб кўрмоқчиман", — деди Фрэнсис ТМZ Sports нашрига берган интервьюсида. “Албатта, бу бошқа спорт тури, лекин зарба кўтара олишимга аминман. Мен ҳар доим боксда ўз кучимни синаб кўрмоқчи бўлганман ва фикримдан воз кечмайман. Агар биз UFC билан келишиб олсак ҳам, бокс шартноманинг бир қисми бўлиши керак, чунки мен фаолиятимни бокссиз якунлашни тасаввур қилолмайман".

Аввалроқ UFC президенти Дана Уайт Сирил Ган устидан ғалаба қозонган тақдирда Фрэнсис Нганну "шартномасидан чиқиб кетмаслиги" ва ташкилотда яна камида битта жанг ўтказишини маълум қилганди.