Нигина Абдураимова бошдан баланд сакрай олмади

Мукофот жамғармаси 75 000 долларни ташкил этувчи ушбу мусобақада Нигина Абдураимова ҳам ўз имкониятини синаб кўряпти. Мамлакатимизнинг биринчи ракеткаси илк даврада рейтингда ўзидан тўққиз поғона қуйида бораётган германиялик Мона Бартелга қарши кортга чиқиб, иродали ғалабага эришганди - 1/6, 6/4, 6/3.   

Афсуски, Нигина 83 дақиқа давом этган 1/8 финал учрашувида дунёнинг 150-ракеткаси, италиялик Лучрезия Стефанинига 3/6, 2/6 ҳисобида имкониятни бой берди. Стефанини Беллинцона турнирида тўртинчи рақам остида ҳаракат қиляпти.   

Таққослаш учун, Нигина Абдураимова айни пайтда WTA рейтингида 240-ўринни эгаллаб турибди. Энди ҳамюртимиз бор эътиборини жуфтликдаги иштирокига қаратади.