01 ноя 10:33
Янгиликлар

Теннис

Нигина Абдураимова Шрусберида ўз омадини синаб кўради

Буюк Британиянинг Шропшир графлиги Шрусбери шаҳрида теннис бўйича ITF W100 турнири бошланди.

Мукофот жамғармаси 100 000 долларни ташкил этувчи ушбу мусобақада ҳамюртимиз Нигина Абдураимова ҳам ўз омадини синаб кўради. Мамлакатимизнинг биринчи ракеткаси 1/16 финалдан ўрин олган учрашувини эртага, 2 ноябрь куни япониялик Мисаки Доига қарши ўтказади.

Таққослаш учун, 28 ёшли Нигина WTA рейтингида 173, 31 ёшли Мисаки эса роппа-роса 150-ўринни эгаллаб турибди. Бу теннисчиларнинг ўзаро ўтказадиган илк учрашуви бўлади ва эртага бизнинг вақт билан соат 14:00да бошланади.

Шунингдек, вакиламиз Шрусбери турнирининг жуфтликлар беллашувида ҳам иштирок этади. Нигина польшалик Паула Кания-Чодун билан ҳамкорликда илк даврада турнирнинг биринчи рақамли жуфтлиги, руминияликлар Моника Никулеску ва Елена Габриэла Русега қарши кортга чиқади.