Ниҳоят, Ислам Махачев жанг санасини тасдиқлади

Россиялик аралаш яккакураш устаси 2025 йилнинг 18 январь куни АҚШнинг Лос-Анжелес шаҳрида ўтказиладиган UFC 311 турнирида октагонга кўтарилади. Катта эҳтимол билан ўша куни унинг рақиби енгил вазн рейтингида биринчи ўринни эгаллаб турган Арман Царукян бўлади. 

"Январь ойида кўришамиз. Жароҳатим деярли безовта қилмаяпти. Машғулотларни бошласам ҳам бўлаверади", - дея "Матч ТВ" телеканалига интервью берган Махачев. 

Аввалроқ UFC раҳбарияти Ислам ва унинг жамоасига айнан январь ойида жанг ўтказиш таклифини берган эди. 

Аслида Ислам Махачев - Арман Царукян жанги 26 октябрь куни Абу-Даби шаҳрида ўтказиладиган UFC 308 турнирининг марказий тўқнашуви бўлиши керак эди. Аммо Ислам Дастин Порьега қарши жангда қўлидан жароҳат олиши натижасида ушбу баҳс амалга ошмай қолганди.