Ниҳоят россиялик юнон-рум курашчиси Ўзбекистон фуқаролигини олди

Аввал маълум қилганимиздек, Олимпия шаҳарчасида якунланган юнон-рум кураши бўйича катталар ўртасидаги мамлакат биринчилигининг энг оғир — 130 кг вазн тоифасидаги беллашувларида асли россиялик спортчи Рафаэль Цицуашвили ғалаба қозониб, олтин медалга эга чиқди. Цицуашвили 2024 йилги Ўзбекистон чемпионатида ҳам тенгсиз бўлганди.

Рафаэль бунга қадар Россия Федерациясининг Ростов вилояти шарафини ҳимоя қилган. Бизга маълум бўлишича, Цицуашвили ниҳоят Ўзбекистон фуқаролигини олишга муваффақ бўлган. Рафаэль Россия спорт устаси ҳисобланади.

Унинг терма жамоамиз аъзоси сифатидаги илк мусобақаси 18-21 ноябрь кунлари Ар-Риёдда (Саудия Арабистони) бўлиб ўтадиган Ислом бирдамлик ўйинлари доирасидаги спорт курашлари мусобақаси бўлади.