Нодирбек Абдусатторов: “Иккинчи ўйинда Магнуснинг имкониятларини паст баҳоладим”

Саралаш баҳслари якунларига кўра кучли тўртликдан жой олган Абдусатторов ярим финалда ҳиндистонлик Аржун Эргаисини 2,5:0,5 ҳисобида мағлубиятга учратди. Финалда эса жаҳоннинг биринчи рақамли шахматчиси, норвегиялик афсона Магнус Карлсенга 1,5:2,5 ҳисобида имкониятни бой бериб қўйди. 

“Натижамдан жуда хурсандман. Саралаш босқичида тай-бреклар томондан омад ҳам бўлди. Энг асосийси  Топ-4`га киришнинг ўзи жуда катта омад. Финалга чиққанимдан ҳам хурсандман, охиригача бор кучимни бердим. Ростини айтсам, ғолиб бўлишимга озгина қолди,” — деди Нодирбек.

Плей-оффга чиқиш форматига тўхталиб, у шундай фикр билдирди: “Агар 8 та йўлланма бўлса, албатта осонроқ бўларди. Топ-4 тизими баъзан жуда кескин ва бироз "тасодифий" ҳам бўлиб кетади. Буни мухлислар ўзи ҳис қилса ҳам бўлади”.

Финалдаги бурилиш нуқталари ҳақида эса Нодирбек очиқ гапирди: “Ўзимни яхши ҳис қилаётгандим. Иккинчи ўйинда унинг имкониятларини паст баҳоладим — позиция дурангга яқин эди, лекин у жуда аниқ ўйнади. Охирги ўйинда ҳам вазият кескин эди: ташаббус учун пиёда қурбонлик қилдим, аммо аниқ давомни топа олмадим. Эндшпиль менга бироз қийинроқ эди ва у охирида ўз имкониятидан фойдаланди. Магнусни табриклайман”.