29 июн 12:38
Янгиликлар

Шахмат

Нодирбек Абдусатторов Руминия турнири пешқадами билан муросага келди

Теглар : Нодирбек Абдусатторов Фабиано Каруана

Руминия пойтахти Бухарест шаҳрида шахмат бўйича "Grand Chess Tour" серияси доирасидаги "Superbet Chess Classic Romania" турнир давом этмоқда.

Ўз ичига 5 та турнирни жамлаган ушбу нуфузли шахмат мусобақасининг умумий мукофот жамғармаси 1,5 миллион АҚШ долларини ташкил этади. Унда ҳамюртимиз Нодирбек Абдусатторов (2766) ҳам ўз маҳоратини намойиш этяпти. Кеча 3-турда у оқ доналарда турнирнинг биринчи рақам остида сараланган шахматчиси, мусобақа пешқадами Фабиано Каруана (АҚШ, 2805)га қарши баҳс олиб бориб, дурангга имзо чекди.

Учинчи турнирнинг қолган барча партияларида ҳам томонлар муросага келишган. Тўртинчи тур олдидан қўшҳокимлик давом этади. Каруана ва ҳиндистонлик Доммаражу Гукеш 2 очкодан жамғариб, турнир жадвалида пешқадамлик қилишяпти. Абдусатторов ва руминиялик Богдан-Даниэль Дяк ҳисобида 1 очкодан бўлиб, улар охирги ўринларда боришмоқда. Бугун Нодирбек 4-турда оқ доналарда франциялик Максим Вашье-Лагравга қарши баҳс олиб боради.

Маълумот учун, "Superbet Chess Classic Romania" турнирининг мукофот жамғармаси 350 000 АҚШ долларини ташкил қилади. Чемпион гроссмейстер 100 000 долларни қўлга киритади.

Турнир иштирокчилари: Фабиано Каруана (АҚШ, 2805), Ян Непомнящий (FIDE, 2770), Нодирбек Абдусатторов (Ўзбекистон, 2766), Доммаражу Гукеш (Ҳиндистон, 2763), Уэсли Со (АҚШ, 2757), Рамешбабу Прагнанандха (Ҳиндистон, 2747), Аниш Гири (Нидерландия, 2745), Алиреза Фирузджа (Франция, 2737), Максим Вашье-Лаграв (Франция, 2732), Богдан-Даньел Дяк (Руминия, 2680).