Нодирбек Абдусатторов Sinquefield Cup 2025 турниридаги юришини бошлади

Grand Chess Tour’нинг якуний классик босқичи 29 августга қадар давом этади ва айланма тизимда 9 турдан иборат бўлади. Ушбу босқич GCT очколари учун сўнгги имконият ҳисобланади. Кечадан дунёнинг кўзга кўринган ва рейтинги юқори бўлган 10 нафар гроссмейстери бош соврин учун баҳсларга киришди. 

Нодирбек Абдусатторов тўрт соатдан ошиқ давом этган 1-тур учрашувида Левон Аронянга имкониятни бой бериб қўйди. Оқ доналарда ҳаракат қилган ҳамюртимиз вақт камлиги сабаб эндшпилга тушиб қолди ва бунинг натижасида хатога йўл қўйди. Америкалик гроссмейстер бир неча кун олдин айнан Сент-Луис шаҳрида якунига етган Saint Louis Rapid and Blitz 2025 турнирида чемпион бўлган эди. Ўшанда Нодирбек ҳар икки блиц партияларида Аронянни мағлубиятга учратганди. Левон кеча ўша мағлубиятлар учун реванш ола билди.    

Биринчи турда Рамешбабу Праггнанандҳа ҳам муҳим ғалабага эришди. У ўзига хос ҳинд дербисида ватандоши, амалдаги жаҳон чемпиони Гукеш Доммараджуни оқ доналарда мағлубиятга учратди. Биринчи турнинг қолган учта партиясида томонлар муросага келишди.  

Бугун 2-тур учрашувлари ўтказилади. Бизнинг вақт билан соат 22:00да бошланадиган турда Нодирбек Абдусатторов амалдаги жаҳон чемпиони Гукеш Доммараджуга қарши қора доналарда ўйнайди.  

Sinquefield Cup 2025. 1-тур натижалари:

Сэм Севиан (АҚШ) - Уэсли Со (АҚШ) - 1/2-1/2

Максим Вашье-Лаграв (Франция) - Алиреза Фирузджа (Франция) - 1/2-1/2

Нодирбек Абдусатторов (Ўзбекистон) - Левон Аронян (АҚШ) - 0-1

Рамешбабу Праггнанадҳа (Ҳиндистон) - Гукеш Доммараджу (Ҳиндистон) - 1-0

Фабиано Каруана (АҚШ) - Ян-Криштоф Дуда (Польша) - 1/2-1/2

Sinquefield Cup 2025. 2-тур жуфтликлари:

Рамешбабу Праггнанадҳа (Ҳиндистон) - Фабиано Каруана (АҚШ)      

Левон Аронян (АҚШ) - Сэм Севиан (АҚШ) 

Уэсли Со (АҚШ) - Максим Вашье-Лаграв (Франция)

Алиреза Фирузджа (Франция) - Ян-Криштоф Дуда (Польша)

Гукеш Доммараджу (Ҳиндистон) - Нодирбек Абдусатторов (Ўзбекистон)