Нодирбек Абдусатторов "Tata Steel Chess India" турнири пешқадами бўлиб олди

Ўз тарихида олтинчи бор ўтказилаётган нуфузли мусобақанинг мукофот жамғармаси 41 500 АҚШ долларини ташкил этади. Турнир 9 тур рапид (25+10) ва 18 тур блиц (3+2) йўналишида ўтказилиб, унда биринчи рақамли шахматчимиз Нодирбек Абдусатторов ҳам бош соврин учун баҳс олиб бормоқда. 

Рапид ва блиц йўналишлари учун алоҳида ғолиб аниқланадиган "Tata Steel Chess India" турнирида Магнус Карлсен ҳам иштирок этяпти. Қувонарлиси, Нодирбек биринчи кунги баҳслардан сўнг турнир жадвалида якка пешқадам бўлиб олди. У кеча ўтказилган 3 та партиянинг 2 тасида ғалаба ва бирида дуранг натижа қайд этди. 

Нодирбек аввалига FIDE байроғи остида ҳаракат қилаётган россиялик Данил Дубов билан муросага келди. Кейин эса германиялик Винсент Кеймер ҳамда ҳиндистонлик Рамешбабу Прагнанандҳани мағлубиятга учратди. Уч имкониятдан икки ярим очко жамғарган Абдусатторов бугунги баҳслар олдидан турнир жадвалида якка карвонбоши бўлиб турибди.