Нодирбек Абдусатторов ва бошқалар Sharjah Masters 2025`дан қанча мукофот пули ишлаб олишди?

Мукофот жамғармаси 73 000 АҚШ долларини ташкил этган ушбу мусобақанинг кучлилар жам бўлган "Masters" гуруҳида гроссмейстеримиз Нодирбек Абдусатторов 9 имкониятдан 6,5 очко тўплаб, 3-ўринни эгаллади. Ҳамюртимиз 10 кунлик меҳнатидан 7000 АҚШ доллари ишлаб олди. 

Нодирбекдан ярим очко кўп тўплаб, Sharjah Masters 2025 турнири чемпионига айланган нидерландиялик Аниш Гири 15 000 доллар қўлга киритди. Абдусатторов сингари 6,5 очко жамғариб, иккинчи ўринни эгаллаган сербиялик Александр Инджич 10 000 долларга бойиб олди. 

Sharjah Masters 2025 турнирининг 9-турида Жаҳонгир Воҳидов оқ доналарда польшалик Малек Жандан устун келди. Муҳиддин Мадаминов қора доналарда туркиялик Ишик Алпарслан билан дуранг ўйнади. Ортиқ Ниғматов эса оқ доналарда яна бир турк шахматчиси Санал Ваҳаб билан муросага келди. Топ-15`таликка кирган шахматчилар ҳам пул мукофотларига эга бўлишди. 

Эътиборлиси, Sharjah Masters 2025 турнирининг С гуруҳида иштирок этган Қиличбек Назаралиев 9 имкониятдан 7,5 очко тўплаб, 2-ўринни эгаллади. Ўз гуруҳида 35-рақам остида сараланганига қарамай, ҳамюртимиз рейтингда ўзидан юқорида бораётган рақибларини ортда қолдиришга муваффақ бўлди. Назаралиев 1100 доллар мукофот пулига ҳам эга чиқди.