Нодирбек Якуббоев асосий рақиби билан дуранг ўйнади

Польшанинг Поляница-Здруй шаҳрида ўтказилаётган шахмат бўйича анъанавий “Akiba Rubinstein International Chess Festival” турнирида 8-тур ортда қолди. Ўз тарихида 61-маротаба ташкил этилаётган ушбу мусобақа 7 та гуруҳда ўтказилаётган бўлиб, кучлилар жам бўлган “ALREH” гуруҳида ҳамюртимиз, халқаро гроссмейстер Нодирбек Якуббоев бош совринга асосий даъвогар бўлиб турибди. Ушбу гуруҳдан 10 нафар гроссмейстер ўрин олган бўлиб, ғолиб 9 тур натижасига кўра, яъни бугун аниқланади. 

“ALREH” гуруҳи иштирокчилари: Аравиндҳ Читҳамбарам (Ҳиндистон) – 2723, Игорь Коваленко (Украина) – 2676, Майкл Адамс (Англия) – 2663, Нодирбек Якуббоев (Ўзбекистон) – 2663, Маттиас Блуебаум (Германия) – 2660, Давид Навара (Чехия) – 2650, Радослав Войташек (Польша) – 2648, Матеуш Бартел (Польша) – 2576, Павел Тецлаф (Польша) – 2571, Ян Климковски (Польша) – 2517

Кеча ўтказилган 8-турда Нодирбек Якуббоев энг яқин таъқибчиси германиялик гроссмейстер Маттиас Блубаум билан дурангга имзо чекди. Ваҳоланки, Нодирбек бу учрашувда ғалабага жуда яқин эди. Шунга қарамай, Якуббоев 6 очко билан турнир жадвалидаги якка пешқадамлигини сақлаб қолди. Маттиас 5 очко билан қўшимча кўрсаткичларга кўра 2-ўринни сақлаб қолди. Чехиялик Давид Навара ва польшалик Радослав Войташек ҳисобида ҳам 5 тадан очко бор. 

Бугун ҳамюртимиз сўнгги 9-турда украиналик гроссмейстер Игорь Коваленкога қарши қора доналарда ўйнайди. Коваленко 4 очко билан 5-ўриндан жой олган. Ушбу баҳсдаги дуранг натижа ҳам Нодирбек Якуббоевни 61th Rubinstein Memorial чемпионига айлантиради.