Нокаутли ғалабалар бўйича UFC рекорчиси фаолиятини якунлади

Яримўрта вазн (77 кг.гача) тоифасида ўз жангларини ўтказиб келган Мэтт Браун фаолиятини якунлаганини расман эълон қилди. Америкалик 43 ёшли Браун ўрта вазнда нокаутли ғалабалар сони бўйича UFC рекордчиси ҳисобланади.  

"Мен бошқа жанг қилмайман. Ўйиндан чиқдим. Бу фаолиятимни расман якунлаганим ҳақидаги қарорим. Бундан буён эътиборимни ёш авлодни тарбиялаш ва тайёрлашга қаратаман. Дана ва UFC ташкилотига ўз брендимни яратиш учун майдон тақдим этишгани учун раҳмат айтмоқчиман. Олдинга юриш вақти келди", — дея ўзининг ижтимоий тармоқдаги саҳифасида хабар ёзиб қолдирган Браун.

Маълумот учун, Мэтт Браун жангларининг 12 тасини нокаут билан якунлаган. Бу эса яримўрта вазн тоифасида UFC рекорди ҳисобланади. Барча вазнлар бўйича эса бу иккинчи кўрсаткичдир. У UFC байроғи остида 2008-2024 йиллар оралиғида жанг қилган.