Номдор рақибасига қарши ўйнаган Абдураимовада аламли мағлубият

Мукофот жамғармаси 100 000 АҚШ долларини ташкил этувчи ушбу мусобақада ҳамюртимиз Нигина Абдураимова ҳам ўз омадини синаб кўряпти. Мамлакатимизнинг биринчи ракеткаси 1/16 финалдан ўрин олган учрашувни япониялик Мисаки Доига қарши ўтказди.

Ҳозиргина якунига етган муросасиз баҳсда Абдураимова номдор рақибасидан аламли тарзда енгилди. Биринчи сет 6/3 ҳисобида Кунчиқар юрт вакиласи фойдасига ҳал бўлди. Иккинчи сетни 1/3 ҳисоби билан бой бераётган Нигина камбэк амалга ошириб, сетлар бўйича мувозанатни тиклади - 6/3. Ҳал қилувчи учинчи сетда 3/0 ҳисобида олдинга чиқиб олган Абдураимова якунда тай-брекда 6/7(2) ҳисобида ютқазди. 

Таққослаш учун, 28 ёшли Нигина WTA рейтингида 173, 31 ёшли Мисаки эса роппа-роса 150-ўринни эгаллаб турибди. Дои турнирнинг еттинчи сараланган теннисчиси эди. Бу теннисчиларнинг ўзаро ўтказган илк учрашуви бўлди. Ҳамюртимиз учрашув давомида 9 та эйс зарбасини амалга оширди. Мисакида бу кўрсаткични 2 тани ташкил қилди.