Нурмагомедов vs Макрегор. Кимда имконият юқори? (сўровнинг давоми)

Бу борада бутунжаҳон оммавий ахборот воситаларида жуда кўплаб мақолалар, шов-шувли хабарлар чоп этилмоқда. Барчасида битта савол: ушбу жангда ким ғолиб бўлади, ҳозирги кунда ким кучлироқ? 

Дарҳаққиқат, бу жангнинг ғолибини аввалдан башорат қилиш жуда ҳам қийин ёхуд ким кучли эканлиги борасида фикр билдириш! Биз юртимиздаги кўзга кўринган спорт журналистлари, спортчи ва мураббийлар, санъат аҳли вакилларининг фикр ва мулоҳазаларини эътиборингизга ҳавола этишни давом эттирамиз. 

Суннат Ильясов - мураббий, ММА бўйича собиқ чемпион

- Хабиб ғалаба қозона олади, деб ўйлайман. Сабаби, у ҳали кучли нокаутларга учрамаган. Яъни, зарба кўтара олади. Одатда, курашчилар зарбага чидамли бўлади. Чунки, оёқ ва бўйинга ишлов яхши берилади. Шунинг учун ҳам тананинг ушбу қисмлари бақувват бўлади.Хабиб одатдаги услубини қўллай олса, Конорни осонгина мағлуб эта олади. Тўғри, ирландиялик спортчи ҳам анойилардан эмас. Зарба кучи, оёқ-қўл техникаси яхши шаклланган. Лекин имконият барибир Нурмагоммедовда юқорироқ. 

Зуфар Сулаймонов - “Оқтепа” профессионал бокс клуби мураббийи

- Икки кучли рақибнинг ўзаро тўқнашуви. Ҳар иккиси ҳам ўз спорт турида катта муваффақиятларга эриша олди. Лекин мен Конорни кўпроқ “Шоумен” сифатида биламан. Хабиб яққол устунлик билан ғалаба қозонади. Чунки, доғистонлик спортчи доимо, ўз иши билан машғул бўлади. Конор Макрегор эса, “пиар”, рекламалар ва бошқа ноодатий ҳатти-ҳаракатлари билан овора бўлиб юрди. Боксда синаб кўрди ўзини, маишатга берилди. Ҳар холда, оммавий ахборот воситалари орқали ушбу холатлардан хабардор бўлганим учун мазкур фикрни билдирмоқдаман. Хабиб омад ёр бўлсин!

Даврон Файзиев – журналист

- Биласизми, бу жанг борасида бирор аниқ фикр билдириш амримаҳол.Чунки, ҳар иккисининг ҳам ўзига хос кучли томонлари бор. Аслида, бу вазн тоифасидаги энг кучли дея Тони Фергюссонни айтган бўлардим. Албатта, бу шахсий фикрим. Шундай бўлсада, Хабибга энг ноқулай рақиб айнан Конор Макгрегор, деб ўйлайман. Жангда ким ғалаба қозонади билмадим-ку, лекин мен Хабиб Нурмагомедовга мухлислик қиламан.

Аҳмаджон ЭШМАТОВ ёзиб олди, ўз мухбиримиз