Нурсултон Рўзибоев UFC'даги кейинги жангини кимга қарши ўтказиши мумкинлиги маълум қилинди + ФОТО

Кеча ҳамюртимиз Instagram саҳифаси орқали 2024 йилнинг февраль ёки март ойида жанг қилишини билдириб, икки рақиб суратини жойлаштирган ҳолда навбатдаги жангига ишора қилган эди.

Маълум бўлишича, ҳамюртимиз кейинги жангини Жеральд Мёршарт (35-17-0) ёки Седрик Дюмасга (9-1-0) қарши ўтказиш ниятида. Мёршарт ҳам, Думас ҳам АҚШ вакили ҳисобланади.

Жеральд Мёршарт UFC'да 19 та жанг ўтказган ва уларнинг 10 тасида ғалаба қозонган, қолган 9 та жангда рақибларига имкониятни бой берган. У охирги жангини 2023 йил август ойида Андре Петроскига қарши ўтказиб, очколар ҳисобига кўра мағлуб бўлган. Қизиғи, Мёршарт UFC'даги фаолияти давомида ўзбекистонлик бошқа бир жангчи - Маҳмуд Мурадов билан ҳам тўқнаш келган ва ғалаба қозонган.

Седрик Думас эса UFC'да ҳозиргача 3 та жанг ўтказган ва уларнинг 2 тасида ғолиб бўлган, бир жангда мағлубиятга учраган. У охирги жангини 2023 йил октябрь ойида Абу Азайтарга қарши ўтказиб, очколар ҳисобига кўра ғалаба қозонган.

Ҳамюртимиз Нурсултон Рўзибоев эса UFC'да ҳозирча битта жанг ўтказган. Унинг илк жангида бразилиялик Бруно Сильва рақиблик қилган. Жанг илк раундда ҳамюртимизнинг ғалабаси билан якунланган.