Одилжон Аслонов ўз ғалабаси билан "Кама"га бош совринни тақдим этди ФОТОГАЛЕРЕЯ

Финалда "Кама" ва "Ленинград" жамоалари ўзаро тўқнаш келди. Турнир профессионал бокс форматида бешта вазн тоифасида (-58, -65, -73, -80 ва 86 кг) ўтказилди. Барча жанглар тўрт раунд этиб белгиланганди.

Биз учун эътиборлиси, ҳамюртимиз Одилжон Аслонов (5-0-1) финалда жанг қилган "Кама" жамоаси таркибида россиялик Дмитрий Кармановга қарши рингга кўтарилди ва рақибини очколар ҳисобига кўра мағлубиятга учратди. Тўрт раунддан фақат биттасида Карманов устунликка эришган.

Шу тариқа, финал баҳсида "Кама" жамоаси "Ленинград" боксчилари устидан умумий 3:2 ҳисобида устун келиб, бош совринни қўлга киритишди. Аслановнинг ғалабаси жамоасининг умумий муваффақиятига замин яратган. "Кама" иккинчи бор "Ғалаба Кубоги"да зафар қучди. Ўтган йилги финалда ҳам "Кама" айнан "Ленинград" жамоасини худди шу ҳисобда таслим этган эди.  

Учинчи ўрин учун кечган қарама-қаршиликда эса "Москва" жамоаси "Кавказ" боксчиларидан 3:2 ҳисобида устун келишди. "Москва" ўтган йили ҳам учинчи ўринни эгаллаганди. 

"Ғалаба Кубоги"нинг мукофот жамғармаси 7,5 миллион рублни ташкил қилади. Ғалаба қозонган жамоа уч миллион, иккинчи ўрин эгаси икки, учинчи ўрин соҳиби эса бир миллион рубль пул мукофотини қўлга киритди. Боксчилар бугунги ўз ғалабалари учун 30 минг рублдан пул мукофотига ҳам эга бўлишди.