ЎФА терма жамоалар бўлимига очиқ савол: 2 та ўйин кам эмасми ёки яна "оқлар-кўклар"га қайтамизми?

21 сентябрдан 6 октябрча бўлган 16 кунлик ФИФА кунлари кутиб турибди. Бу даврда миллий терма жамоалар бемалол 4 та баҳс ўтказиш имконига эга.

Соддароқ айтганда, футбол дунёси катта тезликда олдинга интилмоқда. Биз эса ҳануз “рақиб ким бўларкин? “ деган савол билан кун санаб ўтирибмиз.

Яқингача Аргентина-ю Уругвай, Европанинг ўртамиёналари ва Африканинг жисмонан бақувват жамоалари билан ўртоқлик ўйинлари ўтказиб, ўзимизни чалғитишга, элитага яқинлашдик деган иллюзия билан яшашга ўрганиб қолгандик. Аммо яқиндагина ўтган Жаҳон чемпионати, ундаги шафқатсиз ҳақиқатлар кўзимизни очди. Футбол бизга шундай бешафқат кўзгу тутдики, унда асл қиёфамизни, Осиё ва дунё футболидаги асл ўрнимизни кўриб, совуқ тер босди.

Сунъий равишда яратилган манзилга эмас, ўз даражамизга қайтиш вақти келди. Осиё жамоалари рақиблигини эшитиб таъбимиз ҳира бўлаётган бўлса, демак, муаммо рақибда эмас, мағрурлигимизда. Ўзимизга ҳаддан ташқари юқори баҳо бериб юборганимизда. Энди Осиёга қайтамиз.

Форслар доимги рақиб, Корея билан мўъжиза кутманг

Ҳозирча олдиндаги ФИФА кунларида икки рақиб аниқ: Эрон ва Жанубий Корея.

Форслар билан тўқнашувлар тарихига қарасанг, худди бир фильмни қайта-қайта кўраётгандайсан. Расмий турнир, ўртоқлик мусобақаси, саралаш — Эрон бизнинг доимий ва зерикарли ҳамроҳимизга айланиб бўлди.

Жанубий Корея билан қарама-қаршилик эса бошқа масала. Уларни ростдан ҳам соғиндик. Охирги марта 2018 йилда, Австралия майдонларида Эктор Купер бошчилигида Кореяга 0:4 ҳисобида имкониятни бой бериб, Ливан билан 0:0 ҳисобли дурангни бошдан кечиргандик. Ўшанда ҳам Осиё кубоги олдидан ҳозирлик кўраётган эдик. Орадан йиллар ўтди. Бир авлод нафақага чиқди, янгиси келди. Шу давр ичида биз 1 та мундиал орзуси билан яшаган бўлсак, кореяликлар 3 та Жаҳон чемпионатини бошдан кечиришди.

Бу сафар Каннаваро янги номларни қандай синаши қизиқдир. Лекин тан олиш керак, бу ўйиндан ҳам ҳеч ким мўъжиза кутаётгани йўқ. Ўз номи билан бу ўртоқлик учрашуви.

Дўппини бир четга қўйиб гаплашамиз: Яна ўша эски “касаллик”ми?

Асосий ва энг оғриқли савол очиқлигича қолмоқда: Қолган 2 та ўйинга рақиб қани?

ФИФА кунлари бошланишига бир ҳафта қолганда, бутун футбол олами рақибларининг тактикасини ўрганаётган бир пайтда, бизда ҳануз рақиб қидирилмоқда. Бошқа терма жамоаларда спарринг-рақиблар аллақачон эълон қилиниб, логистика ва меҳмонхоналар банд қилиб бўлинган. Бизда эса сукунат.

Яна ўша эски, аччиқ хотиралар ёдга тушади. Вақтида рақиб топа олмай, “оқлар” ва “кўклар”га бўлиниб ўйнаганларимиз, Суперлигадаги легионерлардан йиғилган терма жамоага қарши майдонга туширганимиз... Европа ва Жанубий Американинг эшигини қоқиб, Аргентинадан тортиб Австралиягача хат ёзиб чиққанларимиз... Туркия миллий терма жамоаси Тошкентга келиши аниқ бўлиб турганда, охирги сонияларда ўйиннинг бекор қилиниши…

Наҳотки, ўша бебурд ва профессионалликдан йироқ кунлар яна қайтмоқда?

Чироқлари ўчган ўзбек футболи

Агар фараз қилайлик, тасодифан рақиб топилди ҳам дейлик. Хўш, уларни қаерда қабул қиламиз? Мана бу ерда томошанинг энг кулгили ва оғриқли қисми бошланади.

Пойтахтдаги асосий стадионимиз —

“Бунёдкор”нинг аҳволига қараб йиғлашни ҳам, кулишни ҳам билмайсан. Бирининг чими абгорликдан энди-энди ўзига келяпти. Тошкентнинг бошқа бир бурчагида эса свет йўқ! Ажабтовур комедия: пайтида миллионлаб доллар сарфлаб қурилган, мамлакатнинг бош аренаси ҳисобланган стадионда оддий чироқ ва майдон чими муаммо!

Биз XXI асрда, Жаҳон чемпионатида қатнашган терма жамоа пойтахтда халқаро ўйин ўтказа олмайдиган даражада заифмиз. Жаҳоннинг гигант жамоаларини қўйинг, Осиёнинг ўртамиёна термасини ҳам бундай аренага таклиф қилиш — шунчаки уят! Яхши ҳам битта ўйинни Фарғонада қабул қиламиз.

Бундай шароитда нафақат рақиб топиш, балки Тошкентда ўйин ташкиллаштиришнинг ўзи катта сўроқ остида қолади.

Хулоса ўрнида

Миллий терма жамоа — бу тажриба ўтказиш майдони эмас. Каннавародан Осиё Кубогида натижа кутилади. Иккита ўйин билан чекланиб, қолган кунларни ким рақиб бўлишини кутиб ўтириш, билмадим.

ЎФА ва терма жамоалар бўлимидан расмий ва аниқ жавоб кутамиз: Биз келажакка тайёргарлик кўряпмизми ёки яна “оқлар-кўклар” ўйинига чипта сотамизми?