ОФК сўров ўтказди. Кутилганидек Эрон клуби ғолиб чиқди

Мана шундай сўровномалардан бири Осиёнинг энг энг машҳур клубини аниқлаш ҳақида бўлди ва бунда кутилганидек Эрон клуби биринчи ўринни эгаллади. Бу тушунарли, чунки эронликлар ОФК ўтказадиган сўровларда жуда фаол эканлигини ҳаммамиз биламиз. Агар Теҳроннинг икки буюк клубидан бири "Истиқлол" ёки "Персеполис" энг машҳур клуб деб топилганида ҳам эътироз унчалик бўлмасди, аммо чемпионликка кўп ҳам даъвогарлик қилмайдиган ўртамиёна "Тракторсози"нинг ғолиб бўлиши жуда ғалати кўринади. 

Сўровда иштирок этган клублар орасида "Тракторсози" 51,14 фоиз овоз билан биринчи бўлди ва бу жамоа учун 1,468,693 мухлис овоз берган. Шарқ минтақасида энг машҳур деб Хитойнинг "Шанхай Шенхуа" клуби топилди. Лекин бу жамоа ҳам на миллий чемпионат, на Осиё чемпионлар лигасида ниманидир қойиллатганини эслаш қийин. 

Бундай олиб қараса, сўровномадаги клубларни кўриб ҳайратдан ёқа ушлайсан. Осиёнинг энг машҳур клуби деганда биз "Ал Ҳилол", "Ал Иттиҳод", "Ал Айн", "Гунгжу Эвергранд", "Урава Редс" каби номларни айтишга ўрганиб қолганмиз. Лекин мухлислар наздида машҳур жамоалар "Ал Виҳдат", "Жоҳор Дарул Таъзим", "Персия Жакарта" кабилар экан.