Оғир атлетика. IWF 2024 йилги асосий мусобақалар рўйхатини эълон қилди

Унга кўра, ўсмирлар ўртасидаги жаҳон чемпионати келгуси йили Перу давлатининг Лима шаҳрида ўтиши белгиланган бўлса, ёшлар ўртасидаги жаҳон чемпионатини Испания мамлакати қабул қилиши назарда тутилган.

Шунингдек, ёшлар-ўсмирлар ва катталар ўртасидаги Ҳамдўстлик чемпионати Фижининг Сува музофотида бўлиб ўтади.

Ҳар учта мусобақанинг ўтказилиш саналари Халқаро оғир атлетика федерацияси(IWF) ва қабул қилувчи давлатлар келишуви асосида эълон қилинади.

2024 йил мобайнида Париж-2024 Олимпиадасининг сўнгги йўлланмаларини тақдим этадиган бир қатор қитъавий мусобақалар ташкил этилиши ҳам тасдиқланди.

Тасдиқланган дастурга биноан Париж-2024 Олимпия ўйинлари йўлланмалари тақдим этиладиган Пан Америка қитъаси чемпионати келгуси йил январь-феврал ойларида ўтказилиши белгиланган бўлиб, қабул қиладиган мамлакат ва аниқ саналари кейинроқ эълон қилиниши назарда тутилди.

Париж-2024 Олимпиадаси йўлланмалари бериладиган Европа чемпионати 2024 йил 17-28 феврал кунлари Туркиянинг Анталия шаҳри мезбонлигида бўлиб ўтиши режалаштирилмоқда.

Океания қитъаси учун Париж-2024 Олимпиадаси саралаш мусобақалари кейинги йили 23-28 феврал кунлари Янги Зеландия давлатининг Окланд шаҳрида ташкил этилади. Айнан шу кунлари яшил қитъанинг ёш оғир атлетикачилари ушбу мамлакатда Океания ёшлар ва ўсмирлар чемпионатида иштирок этиши Халқаро оғир атлетика федерацияси(IWF)  тақвим режасидан жой олган.

Осиё қитъаси оғир атлетикачилари Париж-2024нинг сўнгги чипталарини қўлга киритиш учун 2024 йилнинг 20-27 феврал кунлари мамлакатимиз пойтахти Тошкент спорт майдонларида кураш олиб боради.

Эътиборли жиҳати, оғир атлетика бўйича Париж-2024 Олимпиадасининг энг сўнгги йўлланмалари айнан Ўзбекистонда тақдим этилиши билан тўрт йиллик Олимпия цикли якунланади.

Ўзбекистон оғир атлетика федерацияси Матбуот хизмати