Оғир атлетика. Самарқандда жаҳон чемпионатига борадиган ёш оғир атлетикачилар аниқланмоқда

Жорий йил март ойида Албанияда бўлиб ўтадиган Жаҳон чемпионатига саралаш мусобақаси бўлган чемпионатнинг ортда қолган кунларида бир қатор вазнларда ғолиб ва совриндорлар аниқланди.

Жумладан қизлар ўртасида 55 килограм вазнда ўтказилган баҳсларда қашқадарёлик Шаҳноза Жабборова даст кўтаришда 78, силтаб кўтаришда 100 ва икки кураш натижасига кўра, 178 кило тошни ўзига бўйсундирди ва олтин медалга сазовор бўлди. Кумуш медаль яна бир қашқадарёлик оғир атлетикачи Зиёда Худойқуловага насиб этди. У даст кўтаришда 74, силтаб кўтаришда 85, икки курашда 160 кило тошни кўтаришга эришди. Ушбу вазнда бронза медалига эга чиққан наманганлик Зарбону Раҳимжонова 61/74/135 кўрсаткични қайд этди.

Шунингдек, ўғил болалар ўртасида 55 килограммда Миразиз Мирсобиров (Наманган) 94/120/214 билан олтин,  Бобур Ёқубов (Жиззах) 90/105/195 билан кумуш ва  Наврўз Маҳмудов (Самарқанд) 86/103/189 билан бронзали бўлишди. Ўсмирлар ўртасида 61 килограмм вазнда Азизбек Шомуротов (Хоразм) 103/134/237, Жавоҳир Ғафуров (Самарқанд) 102/123/225, Омадбек Содиқжанов (Наманган) 101/123/225 шохсупадан жой олишди.

Бугун, 24 феврал куни қизлар ўртасида 59 килограммда, ўғил болалар орасида эса 67, 73, ва 81 кило оғирликда Ўзбекистон чемпионлари аниқланади.

Мамлакат биринчилиги баҳслари 27 февралга қадар давом этади.