Олимпия ҳаракати ва сув спорти турлари ривожини янги босқичга олиб чиқиш йўлида муҳим қадам ташланди

World Aquatics президенти, Осиё Олимпия кенгаши (ООК) Бош директори Ҳусайн Ал Мусаллам, Миллий Олимпия қўмиталари ассоциацияси биринчи (МОҚА) вице-президенти, Қатар МОҚ Президенти Шайх Жоаан Ол Сони, ООК вице-президенти Тани Абдулрахмон Ал Кувари бошчилигидаги делегация бугун Ўзбекистон Миллий Олимпия қўмитасида меҳмон бўлди ва юртимизда олимпия ҳаракати, сув спорти турлари ривожини янги босқичга олиб чиқиш мавзусида учрашув ўтказилди.

Унда Ўзбекистон томонидан Спорт вазири Адҳам Икрамов, МОҚ раисининг биринчи ўринбосари, ООК вице-президенти Отабек Умаров, Касаба уюшмалари федерацияси кенгаши раиси, Узбекистан ақуатисс федерацияси раҳбари Қудратилла Рафиков иштирок этишди.

Суҳбат давомида мартабали меҳмонлар юртимизнинг спорт соҳасида улкан ютуқларга эришиб бораётгани халқаро доирада катта қизиқишга сабаб бўлаётгани, мамлакатимиз билан ҳамкорлик алоқаларини янада ривожлантиришдан мамнун бўлишларини билдирдилар.

Учрашувда сув спорти турларини ривожлантириш борасидаги устувор режалар кўриб чиқилди. Хусусан, халқаро семинар ва курслар орқали маҳаллий мутахассисларнинг малакаларини ошириш, спортчиларни йирик мусобақаларга тайёрлашда замонавий методикалардан фойдаланиш каби мавзулар муҳокама қилинди.