Оммавий муштлашув иштирокчилари Фрейтас ва Сильвага жазо белгиланди

Жанжалда Аселино Фрейтас ва Вандерлей Сильва жамоалари ўзаро муштлашиб кетишган ва бу оммавий жанжалга айланганди. Ушбу муштлашув иштирокчиларининг дисквалификация муддатлари маълум бўлди.

Бразилия миллий бокс кенгаши муштлашув иштирокчиларига 2 ойдан 12 ойгача дисквалификация эълон қилди. Фрейтаснинг юзига икки марта зарба берган Сильва энг кўп четлатиш олди - бир йил. 

Қизиғи, Сильвани нокаутга учратган Аселино Фрейтаснинг ўғли Рафаэль Фрейтас ҳозирча жазосиз қолди, чунки у тадбирда расмий мақомга эга бўлмаган. Бразилия миллий бокс кенгаши унга бокс тадбирларига боришни умрбод тақиқлашни тавсия қилди. Бу тавсиянинг бажарилиши мусобақа ташкилотчиларига боғлиқ бўлади.

Боксчиларнинг ўзлари эса 180 кунлик дисквалификация ҳамда Бразилиядаги ҳар қандай бокс мусобақаларида қатнашиш ҳуқуқидан маҳрум қилинди.