Ўқ отувчиларимиз Осиё чемпионатидаги муваффақиятли юришларини давом эттиришмоқда

Қозоғистоннинг Чимкент шаҳрида ўтказилаётган ўқ отиш спорти бўйича 14-Осиё чемпионатида мамлакатимизнинг спорт терма жамоаси таркибидаги Ўзбекистон Республикаси мудофаасига кўмаклашувчи “Ватанпарвар” ташкилоти мерганлари йирик ғалабаларни қўлга киритмоқда.

Жумладан, “Ватанпарвар” ташкилотининг Сурхондарё вилояти кенгаши ўқ отиш спорти секцияси аъзоси Нигина Саидқулова 21 ёшгача бўлган спортчилар ўртасида якка тартибда кечган беллашувда 1-ўринни эгаллаб, олтин медал билан тақдирланди. У, шунингдек, жамоавий баҳсда ҳам ғолибликни қўлга киритиб, иккинчи олтин медалга сазовор бўлди.

“Ватанпарвар” ташкилоти Сурхондарё вилояти кенгашининг яна бир спортчиси Нуриддин Нуриддинов 16 ёшгача бўлган спортчилар ўртасида якка тартибда кечган мусобақада 3-ўринни эгаллаб, бронза медалига сазовор бўлди.

Ташкилотнинг Наманган вилояти кенгаши спортчиси Муҳаммад Камолов 21 ёшгача бўлган спортчилар ўртасида якка тартибда кечган беллашувда 3-ўринни эгаллаб, бронза медали билан тақдирланди. Жамоавий баҳсда эса унга 2-ўрин (кумуш медал) насиб этди.

“Ватанпарвар” ташкилоти Тошкент вилояти кенгашининг ўқ отиш секцияси спортчилари Ойбек Асилов жамоавий кечган баҳсда 1-ўринни эгаллаб, олтин медалга сазовор бўлган бўлса, Ирода Азимбоева 21 ёшгача бўлган спортчилар ўртасида якка тартибда ўтказилган мусобақада 2-ўринни қўлга киритди.

Қозоғистоннинг Чимкент шаҳрида ўтказилаётган ўқ отиш спорти бўйича 14-Осиё чемпионати 20 сентябрь куни якунига етади.

Эслатиб ўтамиз, бир неча кун олдин – 4-11 сентябрь кунлари Россия Федерациясида ўтказилган биринчи МДҲ давлатлари ўйинларида пневматик қуролдан ўқ отиш йўналишида “Ватанпарвар” ташкилоти спортчиси Муҳаммад Камолов фахрли 1-ўринни эгаллаб, олтин медалга сазовор бўлган эди.

Ўзбекистон Республикаси мудофаасига кўмаклашувчи “Ватанпарвар” ташкилоти Матбуот хизмати