Осиё чемпионати-2020да ўзбекистонлик ҳакам ва комиссар ҳам ишлайди

Туркманистон пойтахти Ашхобод шаҳри мезбонлик қиладиган қитъа биринчилиги жорий йил 12 сентябрдан 4 октябрга қадар Литвада ўтказиладиган Жаҳон чемпионатига йўлланма беради.

Қўшни давлатда ташкиллаштириладиган мусобақада ишлаш учун ўзбекистонлик ҳакам Анатолий Рубаков ҳам таклиф этилди. Бундан ташқари, Олим Арифов комиссар сифатида иштирок этади. Футзал бўйича Осиё чемпионати-2020да жами 4 нафар ҳакам назоратчилари, 18 нафар ҳакам ва 4 нафар комиссарлар фаолият олиб боришади.

Осиё чемпионатида 16 терма жамоа 4 гуруҳга бўлинган ҳолда ғолиблик учун кураш олиб боришади. Баҳодир Аҳмедов бошчилигидаги Ўзбекистон миллий терма жамоаси "C" гуруҳида Баҳрайн, Хитой ҳамда Индонезияга қарши баҳс олиб боради.

Эслатиб ўтамиз, қитъанинг энг кучли 5 жамоаси Литвада бўлиб ўтадиган тўққизинчи мундиалга йўлланмани қўлга киритади.