Осиё чемпионати. Баҳромов олтин, Ассакалов ва Фаттоев бронза учун гиламга чиқади

Бугун қитъа чемпионатининг биринчи куни юнон-рум курашчилар ўртасида 5 та вазн тоифасида саралаш беллашувлари ўтказилиб, медаллар учун гиламга чиқадиган жуфтликлар маълум бўлди.

55 кг вазндаги курашчимиз Илҳом Баҳромов 1/4 финалда тожикистонлик Асламжон Азизов, 1/2 финалда эронлик Соулат Поя Марзни мағлубиятга учратиб, финалга йўл олди. Энди Баҳромов Осиё чемпионлиги учун япониялик Шиотани Юга қарши гиламга чиқади. 

63 кг вазн тоифасида юртимиз шарафини ҳимоя қилаётган Рио Олимпиадасининг бронза медали совриндори Елмурат Тасмурадов ироқлик Муҳаммад Аббос Ал Сайдидан устун келди. Аммо, чорак финалда эронлик Мейсам Далҳанига 7-9 ҳисобида ютқазиб қўйди. Бронза медали йўлидаги ўтиш беллашувида қирғизистонлик Урматбек Аматовга имкониятни бой берди.   

77 кг вазнда курашган терма жамоамиз аъзоси Билал Налгиев 1/8 финалда қатарлик Баҳит Шариф Бадрни енгди. Лекин 1/4 финалда ҳиндистонлик Гурприт Сингҳга 8-11 ҳисобида ютқазди. 

87 кг вазн тоифасидаги тажрибали юнон-рум курашчимиз, Токио Олимпиадаси лицензианти Рустам Ассакалов кечки дастурда Осиё чемпионатининг бронза медали учун қозоғистонлик Нурсултон Турсиновга қарши гиламга чиқади.Чорак финалда ҳиндистонлик Кумар Сунилдан устун келган Ассакалов ярим финалда эронлик Насер Ализадеҳга беллашувни бой берди. 

Энг оғир вазн (130 кг) тоифасидаги полвонимиз Суҳроб Фаттоев ҳам бронза медали учун курашади. Унинг рақиби қирғизистонлик Мурат Рамонов бўлади. Фаттоев 1/4 финалда ҳиндистонлик Навин Навинни 9-0 ҳисобида енгди. Ярим финалда эса эронлик Алиакбар Юсуфиаҳмадчалига ютқазиб қўйган.      

Кечки дастур. Медаллар учун кураш

55 кг вазн тоифаси. Финал

Илҳом Баҳромов (Ўзбекистон) - Шиотани Ю (Япония)

87 кг вазн тоифаси. Бронза учун баҳс

Рустам Ассакалов (Ўзбекистон) - Нурсултон Турсинов (Қозоғистон)

130 кг вазн тоифаси. Бронза учун баҳс

Суҳроб Фаттоев (Ўзбекистон) - Мурат Рамонов (Қирғизистон)