Осиё чемпионати. Финалда Абдуллаев - Кумар баҳси бўлмайди. Уч курашчимиз бронза учун курашади

Бироз аввал қитъа чемпионатининг бешинчи кунги саралаш беллашувлари якунланиб, кечки дастурда медаллар учун гиламга чиқадиган жуфтликлар маълум бўлди. 

Афсуски, бугун кумуш ёки олтин медаль бўлмайди. Эркин курашчиларимиздан уч нафари кечки дастурда бронза медали учун гиламга чиқишади. Камида финалга чиқишини кутганимиз Ғуломжон Абдуллаев чорак финалда қозоғистонлик Раҳат Калжанга 1-6 ҳисобида имкониятни бой бериб қўйди. 

Токио Олимпиадаси иштирокчиси ҳисобланган Абдуллаев ўтиш учрашувида шри-ланкалик Гайан Мудиянселагедан 4-0 ҳисобида устун келди. Энди у бронза медали учун қирғизистонлик Алмаз Сманбековга қарши баҳс олиб боради. Финалда Рави Кумар (Ҳиндистон) - Раҳат Калжан (Қозоғистон) баҳсига гувоҳ бўламиз. 

Бронза учун гиламга чиқадиган курашчиларимиз:

-57 кг: Ғуломжон Абдуллаев - Алмаз Сманбеков (Қирғизистон) 

-65 кг: Аббос Раҳмонов - Ҳажи Муҳаммад Али (Баҳрайн)

-97 кг: Муҳаммадрасул Раҳимов - Мамед Ибрагимов (Қозоғистон)

Эркин курашчиларимиздан Бегижон Қўлдошев (-70 кг) илк даврада кореялик Ёнсеок Жеонгга 5-6, Жасурбек Усмонохунов (-79 кг) эса бошқа бир корейс курашчиси Бумгео Сеога 4-5 ҳисобида ютқазиб қўйди.