Осиё кубоги. Оғир атлетикачиларимиздан яна медаллар шодаси

Бугун хотин-қизлар ўртасида 63 ҳамда 69 кг. вазн тоифаларида беллашувлар ўтказилиб, уларнинг якунига кўра  63 кг. вазн тоифасида чиқиш қилган Кумушхон Файзуллаева умумий 201 кг. натижаси билан олтин медалга сазовор бўлган бўлса, 69 кг. вазн тоифасида иштирок этган Турсуной Жабборова 199 кг. оғирликни ўзига бўйсундириб кумуш медалини қўлга киритганди.

Бундан бир неча дақиқа аввал эркаклар ўртасида 85 кг. вазн тоифасидаги беллашувлар ҳам якунланди. Ушбу вазн тоифасида терма жамоамизнинг икки нафар аъзоси ғолиблик учун кураш олиб борди. Суннатилла Ўсаров даст кўтаришда 158 кг, силтаб кўтаришда 186 кг, суммада 344 кг. натижа билан мусобақанинг кумуш медалига сазовор бўлди. Эътиборлиси, Суннатилла олтин медални қўлга киритган эронлик Али Маквандига бор йўғи 1 килограммга имкониятни бой берди. Зеро эронлик спортчи умумий 345 кг. натижаси билан биринчи ўринни эгаллади.

Ушбу вазн тоифасида бронза медали ҳам ўзбекистонлик атлетга насиб этди.  Файзулло Набиев 148+189=337 кг. натижаси билан учинчи ўринга лойиқ кўрилди. Ана шу тариқа бугунги беллашувлар якунланди. Эртага мусобақалар давом этади ва биз юртдошларимиздан навбатдаги медаллар ва рекордларни кутиб қоламиз.