Остиндаги UFC турнири жангларидан бири бекор қилинди

Ўрта вазн тоифасида UFC чемпионлиги учун собиқ даъвогар Жаред Каннонир машғулот вақтида тиззасидан жароҳат олди. Бунинг натижасида унинг Роман Долидзега қарши жанги бекор қилинди. 

"Пайшанба куни жарроҳлик столига ётаман. Тиззамнинг мушак боғламалари узилиб кетди. Декабрь ойидаги жангим ўтказилмайди. Бу ҳақда UFC`дагиларни ҳам огоҳлантирдим. Улар бундан хабардорлар", - дея Каннонирнинг сўзларини келтиради MMAJunkie. 

Жареднинг айтишича, унга Пауло Костанинг ўрнига Хамзат Чимаев билан жанг қилиш таклифини беришган экан.

"Менга Чимаевга қарши октагонга чиқиш таклифи билан қўнғироқ қилишди. Менежеримга "ҳа" деган жавобни айтишга улгурмай, машғулотда жароҳат олиб ўтирибман. Менга 10 октябрь куни қўнғироқ қилишган эди", - деди Канонир. 

Роман Долидзе омадсиз жангчи бўлиб қолмоқда. Аввалроқ унинг Дерек Брансон билан жанги бекор бўлганди.