Ўзбек спортида тарихий воқеа! Жасурбек Рустамхонов АҚШ хоккей клуби томонидан драфт қилинди!

Жорий мавсумда 18 ёшли Рустамхонов Чехиянинг "Karlovy" ёшлар жамоасида ўйнади. У 30 та ўйинда 23 очко (13 та гол ва 10 та ассист) тўплади.

АҚШ ёшлар хоккей лигасида иштирок этувчи "Dubuque Fighting Saints" клубининг бош менежери Тревор Эдвардс ўзбекистонлик ҳужумчини юқори баҳолаб, уни "жуда динамик ва самарали гол уриш қобилиятига эга ўйинчи" деб атади. Шунингдек, Рустамхоновнинг халқаро мусобақаларда Ўзбекистон терма жамоаси сафида ажойиб ўйин кўрсатганини таъкидлади.

Маълум қилинишича, хоккейчи июнь ойида АҚШнинг Айова штати, Дубьюк шаҳрига синов йиғини учун боради. Клубнинг асосий йиғини 9–12 июнь кунлари бўлиб ўтади. Икки кунлик драфт давомида жамоа жами 30 нафар ўйинчини танлаб олган.

USHL — Шимолий Америкадаги энг кучли ёшлар хоккей лигаларидан бири бўлиб, у орқали ўйинчилар кейинчалик NCAA ва NHL каби юқори даражаларга чиқиш имконига эга бўлишади.

Бу Ўзбекистон хоккейи тарихидаги илк драфт ҳисобланади. Маълумот учун, Драфт қилинди дегани — клуб уни келажакда жамоага қўшиш учун танлаб олди деганидир. Бу ҳали расмий шартнома эмас, лекин катта имконият. Жасурбек Рустамхонов аввал синов йиғинидан ўтиши керак. Агар ўзини яхши кўрсатса, АҚШда ўйнашни бошлайди.