Ўзбекистон Davis Cup - Group III турниридаги иштирокини бошлаш арафасида

Унда Дмитрий Томошеевич сардорлигидаги Ўзбекистон терма жамоаси ҳам иштирок этади. Тажрибали мутахассис Петр Лебедь жамоа бош мураббийи сифатида Малайзияга йўл олган. Гуруҳ босқичида вакилларимиз Сингапур, Филиппин ва Иордания терма жамоаларига қарши кортга чиқади. Бизнинг вақт билан эртага тонгги соат 07:00да Сингапурга қарши учрашув бошланади. 

Терма жамоамиз таркибидан Сергей Фомин, Амир Милушев, Абдулазиз Усмонжонов ва Дамир Абдусамадов жой олган. Мамлакатимизнинг иккинчи ракеткаси Ҳумоюн Султонов бу сафар таркибга жалб этилмаган.   

Таққослаш учун, Ўзбекистон айни пайтда Жаҳон рейтингида 68, Сингапур эса 89-ўринни эгаллаб турибди. Биринчи ракеткамиз Сергей Фомин ATP рейтингида 295, Сингапурнинг биринчи рақамли теннисчиси Билл Чен 1373-ўринни банд этган. 

Маълумот учун, терма жамоамиз Дэвис Кубогида Нигерия, Гонконг, Босния ва Герцеговиниядан қабул қилиб олинган кетма-кет учта мағлубиятдан кейин Осиё-Океания минтақасида учинчи гуруҳга тушиб кетди. Сўнгги ғалабамиз 2024 йил сентябрь ойида Эстонияга қарши учрашувда қўлга киритилган эди.