Ўзбекистон делегациясининг Аичи-Нагоя-2026 ёзги Осиё ўйинларига тайёргарлиги муҳокама қилинди

Шу муносабат билан Спорт вазирлиги ва Миллий Олимпия қўмитаси раҳбарияти иштирокида бўлажак йирик комплекс мусобақага, шунингдек, “Президент Олимпиадаси”нинг финал босқичига олиб борилаётган тайёргарлик жараёнлари муҳокама қилинди.

Йиғилишда Ўзбекистон делегациясининг Аичи-Нагоя-2026 ёзги Осиё ўйинларидаги иштироки, спортчиларнинг тайёргарлик ҳолати ва мусобақадаги имкониятлари юзасидан маълумотлар тақдим этилди. Хусусан, делегациямиз қатнашаётган спорт турлари ҳамда уларнинг имкониятлари ҳар бир атлет кесимида муҳокама қилинди ва батафсил кўриб чиқилди. Масъулларга мусобақада муносиб иштирок этиш, барча спорт турида максимал натижа учун курашиш вазифаси белгиланди.

Шунингдек, “Президент Олимпиадаси” финал босқичини юқори савияда ташкил этиш масалалари ҳам атрофлича кўриб чиқилди. Финал дастурига киритилган спорт турлари, беллашувлар ўтказиладиган иншоотлар, меҳмонларни жойлаштириш, ареналарни безатиш ҳамда ташкилий ишлар билан боғлиқ бошқа масалалар юзасидан фикр алмашилди.

Йиғилиш якунида ҳар икки йирик спорт тадбирига тайёргарликнинг барча йўналишлари бўйича масъулларга тегишли топшириқ ва кўрсатмалар берилди.