Ўзбекистон дзюдо федерацияси ТерДУ билан ҳамкорликни йўлга қўяди

Куни кеча ҳамкор олий ўқув юртлари сони яна биттага кўпайди - 72 йиллик тарихга эга Термиз Давлат Университети (ТерДУ)! Шу муносабат билан бевосита Термиз шаҳрида учрашув ташкил этилди. Унда Ўзбекистон дзюдо федерацияси раиси Зафар Қаҳрамонов, Федерациянинг вилоятлар билан ишлаш бўлими бошлиғи Бахтиёр Юлдашев, Федерациянинг Сурхондарё вилояти бўлими раиси Тўлқин Валиев, Университет ректори Абдуқодир Тошқулов, проректорлар ҳамда спорт таълимига маъсуллар иштирок этишди.

Маълумот учун, 1954 йилда ташкил этилган Термиз Давлат Униерситетида 13 та факультет бўлиб, бугунги кунда 22 114 нафар талаба таҳсил олмоқда. Улардан 4000 нафари мунтазам спорт билан шуғулланади. Дзюдо бўлимидаги талабалар сони 100 нафарга яқин. Ҳозирда Университет томонидан тоғли Бойсун туманида "Дарбанд" спорт базаси бунёд этилмоқда. Бу маскан фойдаланишга топширилгач, дзюдочилар ўқув-машғулот йиғинларини ўтказиш имконига эга бўладилар.

Маълумот учун, Сурхондарё вилоятида Президент Қарори билан ташкил этилган Республикамиздаги иккита Дзюдо маҳорат мактабидан бири (Денов) фаолият юритмоқда. Япониялик мураббий Жунна Кикучи сурхондарёлик ёш дзюдочилар билан бирга самарали ишлаб келяпти.

Университетда бўлиб ўтган учрашувда ҳамкорликни янги босқичга олиб чиқиш масалалари муҳокама қилинди ва тез кунда ана шу барча йўналишларни ўз ичига олган Меморандум имзоланади.