Ўзбекистон каратэ миллий федерациясидан янги акция: видеороликлар танловида иштирок этинг ва ғолиб сифатида 10 миллион сўмни қўлга киритинг!

Сиз аҳоли ўртасида соғлом турмуш тарзини кенг тарғиб қилиш ва оммавий спортни ривожлантириш бўйича давлатимиз сиёсатига ҳамоҳанг тарзда, шунингдек, Олимпия оиласига кирувчи каратэ спортига ўсиб келаётган ёшларни кўпроқ жалб этиш, уларда каратэ спорт турига алоҳида меҳр уйғотишга қаратилган махсус видеороликлар тайёрланг ҳамда Ўзбекистон каратэ миллий федерациясининг махсус совринига эга бўлинг!

Видеороликларда ушбу спорт тури билан мунтазам шуғулланиб, юқори мақсадларни кўзлаётган умидли ёшларнинг иштиёқи ва маълум натижаларга эришган спортчиларнинг бой тажрибасини умумлаштира олсангиз – ғолиблик айнан сизники бўлади.

«Янги Ўзбекистон – ўзбек каратэсининг янги даври», «Мен каратэни севаман» ва «Биз оммавийликда биринчимиз» тарғибот шиорлари остида сиз томонингиздан тайёрланиб, энг яхши дея эътироф этилган видеороликлар мамлакатимиздаги телеканаллар орқали намойиш этилиши кўзда тутилган. Шундай экан, видеороликларнинг нафақат мазмуни, балки сифатига ҳам алоҳида эътибор қаратиш лозим.

Видеоролик каратэ спортининг жозибадорлигини кўрсатиб бериши ва табиат билан ҳамоҳанг кўринишда бўлиши, шунингдек, юртимизнинг тарихий обидалари ва замонавий иншоотлари фонида тасвирга олинган бўлиши талаб қилинади.

Энг яхши дея эътироф этилган видеороликлар кетма-кетликда 10 000 000 сўм (1-ўрин), 5 000 000 сўм (2-ўрин) ва 3 000 000 сўм (3-ўрин) миқдоридаги пул мукофотлари билан тақдирланади. Ғолиб ва совриндорлар 15 кун ичида эълон қилинади.