Ўзбекистон каратэ миллий федерациясининг фаолияти танқидий кўриб чиқилди

Унда Жисмоний тарбия ва спорт вазирининг биринчи ўринбосари Равшан Эрматов, Миллий олимпия қўмитаси Бош котиби Ойбек Касимов, вазирликнинг тегишли бошқарма ва бўлим бошлиқлари, Ўзбекистон каратэ миллий федерацияси раҳбарияти, мураббийлар ҳамда терма жамоа аъзолари иштирок этди.

Йиғилиш кескин ва танқидий руҳда ўтиб, унда сўнгги йилларда Ўзбекистон каратэ миллий федерациясида содир бўлган ўзгаришлар спортдаги натижаларга ҳам салбий таъсир кўрсатгани, оқибатда айни пайтга келиб ушбу олимпия спорт турида вакилларимиз Токио олимпиадасига биронта ҳам йўлланмани қўлга кирита олишмагани жиддий танқид қилинди.

Спортчилар ҳар қандай шароитда ҳам ўз ишига профессионал даражада ёндашган ҳолда машғулотларга жиддий эътибор қаратиши кераклиги, терма жамоа аъзолари Жисмоний тарбия ва спорт вазирлиги ҳамда Миллий олимпия қўмитасининг доимий назоратида эканлиги, ҳукуматимиз томонидан жаҳон ареналарида ватанимиз шарафини ҳимоя қиладиган спортчиларимизга доимий ғамхўрлик кўрсатилиши таъкидланди.

Шунингдек, йиғилишда Ўзбекистон каратэ миллий федерацияси раҳбариятига олдинда турган вазифаларга жиддий ёндашиш кераклиги, яқинда бўлиб ўтадиган Ўзбекистон кубоги мусобақасининг адолатли ва шаффоф ўтишини таъминлаш, терма жамоада рақобатни янада ошириш, бунинг учун селекция ишларини кучайтириш лозимлиги уқтирилди.