Ўзбекистон МДҲ ўйинларида медаллар жамғариш бўйича нечанчи ўринда?

Илк бор ташкил этилаётган мусобақанинг бугун иккинчи кунги баҳслари ўтказиляпти. Айни шу дақиқаларга келиб Ўзбекистон спорт делегацияси ҳисобидаги медаллар сони 8 тага етган. Иккита кумуш ва 6 та бронза медали билан умумжамоа ҳисобида 5-ўринни эгаллаб турибмиз. Кеча мусобақанинг биринчи куни юнон-рум курашчиларимиз 2 та кумуш ва 2 та бронза медалини қўлга киритишган эди.

Бугун эса боксчиларимиздан тўрт нафари ярим финалга етиб келди ва бу босқичда рақибларига имкониятни бой бериб қўйишди. Бу билан делегациямиз ҳисобига яна 4 та бронза медали қўшилди. Ўғил болалар ўртасида Умидилло Абдурасулов (-60 кг), Жаъфарбек Шаҳбозов (-66 кг), қизларда Узукжамол Юнусова (-52 кг) ва Гулдана Тилеубергенова (-54 кг) бронза медалига сазовор бўлишди. 

Кутилганидек, Россия терма жамоаси медаллар жамғариш бўйича пешқадамлик қиляпти. Мусобақа мезбонлари ҳозиргача 5 та олтин, 2 та кумуш, 6 та бронза, жами 13 та медаль қўлга киритиб улгуришди. Учта олтин, 1 та кумуш, 7 та бронза медалига эга Озарбайжон иккинчи, 2 та олтин, 1 та кумуш, 2 та бронза медалини расмийлаштирган Беларусь терма жамоаси учинчи поғонадан жой олган. Қозоғистонлик спортчилар эса 3 та кумуш, 15 та бронза медали билан 4-ўринни банд этишган.