Ўзбекистон - Қозоғистон қарама-қаршилиги, Дубайдаги ўзбеклар, фотосессия ва бошқалар ҳақида

Дубайга мусобақа бошланишидан бир кун олдин, яъни 23 май куни Ўзбекистон бокс федерацияси вакиллари билан бирга келдик. Мусобақа иштирокчилари аэропортдан у қадар узоқ бўлмаган "La Meridian"  меҳмонхонасида истиқомат қилишмоқда. Мусобақанинг ўзи ҳам айнан ушбу меҳмонхонанинг ўзида жойлашган катта залда ташкил этилмоқда. Карантин сабаб меҳмонхонадан ташқарига чиқиш ҳам, ташқаридан меҳмонхонага кириш ҳам таъқиқланган. 

Айтганча, Дубайга келишимиз билан аэропортнинг ўзида Covid-19 учун тест топширдик. Нима учундир бу ерда тест топшириш бепул ва деярли навбат кутишсиз экан)

Осиё чемпионати муносабати билан бу ерда мураббийлар, ҳакамлар ва бошқа мутахассислар учун малака ошириш курслари ташкил этилган. Бунгача мураббийларимиз Раҳматжон Рўзохунов ва Равшан Ходжаев "3 юлдузли мураббий" мақомини олиш учун, Ўзбекистон бокс федерацияси Халқаро бўлим вакиллари Шоҳид Тиллабоев ҳамда Тамила Сариханова "ITO" ходим сифатида ишлаш учун курсларида малака оширишмоқда. Ушбу мақола таҳрир қилиниши олдидан мураббийларимиз "3 юлдузли мураббий"га айланишди. Сайтимиз номидан уларни муборакбод этиб қоламиз. 

Бу ерга келиб шу нарсага амин бўлдикки, мусобақа учун ажратилган меҳмонхонада овқатланиш билан боғлиқ озгина муаммолар кўзга ташланди. Аниқроғи, ўзбек спортчиларининг овқатланиш рациони учун етарли бўлмаган озуқаларни кўриш мумкин эди. Аммо Ўзбекистон бокс федерацияси мутасаддилари ушбу муаммони бартараф этиш мақсадида Ватанимиздан ўзбек боксчилари учун мос бўлган қўшимча озиқ-овқатларни олиб келишди. Бундан ташқари Дубайда истиқомат қиладиган юртдошларимиз ҳам чарм қўлқоп усталаримизни ташкилий томонлама қўллаб-қувватлаб келишмоқда. Инстаграм тармоғидаги машҳур блогер Дитто, Азизхон Юнусов бошчилик қиладиган ресторан вакиллари, ҳозирда БАА терма жамоасида бош мураббий сифатида фаолият олиб бораётган Ҳасан ака (Муҳаммедов) терма жамоамиз аъзоларини қўллаб-қувватлашмоқда. Шунингдек Дубай шаҳридаги консул Алишер Саломов ҳам боксчиларимиз билан учрашувда ташкилий томонлама ёрдамга тайёр эканлигини маълум қилди. 

Дарвоқе, орада Ўзбекистон эркаклар ва аёллар терма жамоалари билан фотосессия ҳам ташкил этдик. 

Мусобақанинг ўзи ҳақида гапирадиган бўлсак, Ўзбекистон терма жамоаси боксчиларининг 13 нафари финалга йўл олишди. Қизларимизнинг 6 нафари, йигитларимиздан эса 7 нафар боксчи 30 ва 31 май кунлари ўтказиладиган финал жангларида рингга кўтарилишади. Очиғини айтиш лозим, қизларимизнинг бундай иштироки бизни яхши маънода ҳайратлантирмоқда. Бунгача ўзбек боксчи қизлари катталар ўртасидаги Осиё чемпионатида 8 та медаль қўлга киритишмаган. Ярим финалдан сўнг қизларимизда иккита бронза бор. Эртанги финалдан сўнг эса олтин ва кумуш медалларимиз сони аниқ бўлади. Умид қиламизки, медалларнинг асосий қисми юқори пробали бўлади ;)

Эркаклар терма жамоасининг ғалабали юришига-ку, ўрганиб қолганмиз. 31 май кунги финал жангларидан шахсан мен камида 5 та олтин медаль кутмоқдаман. Айтганча, эркаклар терма жамоамиз вакилларининг барчаси Ўзбекистонга медаль билан қайтади. Медаллар сони бўйича Ўзбекистон эркаклар терма жамоаси умумжамоа ҳисобида биринчи ўринни қўлга киритиб улгурди. Энди эса медаллар сифати бўйича ҳам пешқадамликни сақлаб қолиш керак бўлади. Йигитларимизнинг асосий рақобатчилари - Қозоғистон терма жамоаси эса финалга 5 нафар вакили билан етиб келган. Финалларда 4 та вазнда Ўзбекистон - Қозоғистон қарама-қаршилигини томоша қилишимиз мумкин бўлади. Бундан ташқари Ҳиндистон, Мўғулистон ва Эрон вакиллари ҳам финалларда олтин медаль учун курашишади.

Фурсатдан фойдаланиб, ушбу сафарни ташкил этишда ташаббус кўрсатган Ўзбекистон бокс федерациясига миннатдорчилик билдирамиз.

Азиз Тўхтамуродов, Дубай шаҳридан

ФИНАЛ ЖАНГЛАРИ РЎЙХАТИ:

30 май, аёллар:

31 май, эркаклар: