Ўзбекистон ва Қирғизистон дзюдо федерациялари ўртасида ҳамкорлик Меморандуми имзоланди

Мусобақа доирасида Ўзбекистон ва Қирғизистон дзюдо федерациялари раҳбарлари ўзаро ҳамкорлик Меморандуми имзолашди.

Ўзбекистон МОҚ раиси ўринбосари, мамлакат дзюдо федерацияси раиси Азизжон Камилов қитъа чемпионатини бевосита кузатиб бориш мақсадида Бишкекка етиб борган. Бугун Азизжон Якубжанович қирғизистонлик ҳамкасби Жолдошбек Колбаев билан учрашди. 

Суҳбат давомида А.Камилов Осиё-Океания чемпионатининг юқори савияда ташкил этилаётгани билан мезбонларни табриклади. Тадбир давомида расмийлар ўзаро ҳамкорлик Меморандумига ҳам имзо чекишди.

Унга кўра, дзюдо бўйича Ўзбекистон ва Қирғизистон терма жамоалари йирик мусобақаларга тайёргарлик жараёнида дўстона ҳамкорликни мустаҳкамлашади. Терма жамоалар ўртасида ўқув-машғулот йиғинлари ташкил этилади. Мулоқот давомида ҳар икки раҳбар қардош мамлакатлар ўртасидаги дўстона алоқаларни спорт соҳасида янада мустаҳкамлаш бўйича келишиб олишди.

Шунингдек, тадбир давомида Осиё дзюдо федерацияси президенти Обайд ал Анзи билан ҳам учрашув бўлиб ўтди. Унда мамлакатимизда дзюдо оммавийлигини ошириш ҳамда Токио-2020 Олимпиадасига тайёргарлик кўриш борасида музокаралар олиб борилди.

Учрашув якунида Азизжон Камилов Обайд ал Анзи ҳамда Жодошбек Колбаевга Ўзбекистон дзюдо федерациясининг эсдалик совғаларини тақдим қилди.