Ўзбекистонлик таниқли блогер - Мигрантлардан чиққан юлдузлар ҳақида

"Куни кеча ММА бўйича дунёнинг энг нуфузли турнирларидан бири UFC'да дебют қилган ҳамюртимиз Нурсултон Рўзибоев, андердог бўлишига қарамасдан, фаворит ҳисобланган рақибини биринчи раунддаёқ нокаутга учратиб, ғалаба қозонди. Ўша рақиби бугунги кунгача бирор марта мағлубиятга учрамаган ва "Халк" лақабини олган, жуда кучли жангчи эди.



Жанг пайти Setanta шарҳловчиларининг Нурсултон ҳақидаги гаплари эътиборимни тортди. Бу йигит 2012 йилда Россияга ишлагани кетган экан... UFC`даги яна бир вакилимиз Маҳмуд Мурадов ҳам бир пайтлар Россияга гастербайтер бўлиб борган эди...

Суриштирилса, спорт, санъат ва яна бошқа турли соҳаларда танилган инсонларнинг ҳам бекграундида шу тарих бор. 

Жангдан кейин Нурсултоннинг "10 йилдан бери UFC'га чиқишни кутаман" деб йиғлаб юборгани ҳам одамни ғалати қилиб юборди. Қойил қолдим. Шунча қийинчилик, шунча интилишлардан кейин одам ўзи мақсад қилган, орзу қилган чўққисига чиқди, чиққандаям ёрқин равишда порлаб берди. Энг яхши жанглар қаторида 50 минг долларлик бонусни ҳам олди биринчи жангидаёқ. UFC жангни ўзи учун янги келган нонеймларга 10-16 минг доллар беради холос.

Ўша мигрантлик даврларида бу йигитлар шундай кунлар келишини ўйлашганмиди? Менимча ҳа, чунки яхши ният бу ярим давлат. Инсоннинг ҳамиша ўйлаб юрган нарсасига ўша миядаги кайфият ҳам яқинлаштириб боради. Қойил Нурсултон!

Нурбек Алимов  - блогер.