ЎзДЖТСУда “Янги Ўзбекистон - янги ғалабалар сари!” шиори остида тадбир ўтказилди + ФОТО

“Янги Ўзбекистон – янги ғалабалар сари!” шиори остида ўтказилган тадбирда Спортни бошқариш ва туризм факультети талабалари тош кўтариш, арқон тортиш, армрестлинг ва шахмат бўйича беллашувларда иштирок этишди.

Университетнинг янгидан барпо этилган кўркам ва шинам кураш залида ташкил этилган беллашувларнинг дастлаб, тантанали очилиш маросими ташкил этилди. Маросимда университет раҳбарияти, профессор-ўқитувчилари иштирок этишди. Шундан сўнг беллашувларга старт берилди.

Қизғин ва муросасиз тарзда ўтган мусобақаларнинг якуний натижаларига кўра, тош кўтариш баҳсларида 16 килолик тошни юз марта кўтарган Гимнастика назарияси ва услубияти кафедраси талабаси Ш. Шербоев фахрли биринчи ўринни эгаллади. Арқон тортиш мусобақасида энг кучли жамоа – Спорт иқтисодиёти ва менежменти кафедрасидан ташкил топган жамоаси бўлди.

Армрестлинг бўйича 70 кг. вазн тоифасида Жисмоний тарбия, спорт назарияси ва услубияти кафедрасидан Ойбек Мамасиддиқов, 75 кг.да  Алишер Очилов, 80 кг.да Спорт тадбирларини ташкил этиш кафедрасидан Антон Колометов, 90 кг. да Спорт иқтисодиёти ва менежменти кафедрасидан Абдуазиз Раҳимжоновлар ғолиб деб топилди. 

Спортнинг шахмат туридан ўтказилган беллашувда эса жамоавий баҳсларда биринчи ўринни Спорт иқтисодиёти ва менежменти кафедраси жамоаси қўлга киритди. 

Беллашувлар якунига етгач, Университет маданият саройида ғолиб ва совриндор спортчиларни тақдирлаш ҳамда “Халқаро талабалар куни”га бағишланган маданий тадбир ўтказилди.

Юқори савияда ташкил этилган маданий тадбир эл севган таниқли хонандалар, сўз усталарининг бадиий чиқишлари билан бошланиб кетди. Ижро этилган шўх тароналар маданият саройини тўлдириб ўтирган талабаларга унутилмас завқ-шавқ улашди.

Тадбир сўнггида мусобақа ғолиб ва совриндорлари катта саҳнада диплом, медаль ва эсдалик совғалари билан мукофотланишди. Шунингдек, тадбир доирасида факультетнинг энг фаол талабалари ва уларнинг ота-оналарига ҳам ташаккурнома ва эсдалик совғалари улашилди.

Азизхон ТИЛЛЯХОДЖАЕВ, Спортни бошқариш ва туризм факультети декани, иқтисодиёт фанлари бўйича фалсафа доктори (PhD), доцент: 

- Бугунги тадбирни ўтказишимиздан мақсадимиз, “Халқаро талабалар куни”да университетимиз талабаларини ушбу кун билан қутлаш, қолаверса, талабаларимиз ўртасида ўзаро дўстлик, ҳамжиҳатликни янада мустаҳкамлаш, жисмоний тарбия ва спортни кенг оммалаштиришдан иборат. Факультетимиз талабалари ўртасидаги беллашувлар гувоҳи бўлганингиздек, қизғин тарзда ўтди. Бу каби маънавий-маърифий, спорт тадбирларини  доимий тарзда ўтказишни режалаштирганмиз. Маданият саройимизда бўлиб ўтган тадбирда иштирок этган барча талабаларимизнинг ҳам юз-кўзларида хурсандчилик, янги марралар, янги ғалабалар сари интилаётгани акс этиб тургани биз устозларга ҳам қувонч бағишлади.

Илҳом РАҲМОНОВ тайёрлади