Озодбек — Жаҳон чемпионатининг кумуш медали совриндори!

Мусобақанинг сўнгги куни юнон-рум кураши бўйича бешта вазнда ғолиб ва совриндорлар номи маълум бўлди. Олимжон Қурбонов ва Бахтиёр Сайфиев мураббийлигидаги 3 нафар классигимиз кечаги баҳсларда жаҳон чемпионати медаллари учун гиламга чиқишди.

Қувонарлиси, саралаш беллашувларида муваффақиятли иштирок этган Озодбек Халимбоев финалга қадар етиб келди. 45 кг вазн тоифасидаги курашчимиз 1/8 финалда исроиллик Амаре Фетенени 7-0, 1/4 финалда арманистонлик Левон Мартиросянни 6-0, 1/2 финалда эса грузиялик Анри Хозреванидзени 11-0 ҳисобида доғда қолдирди. Жаҳон чемпионатининг олтин медали учун кечган беллашувда эса украиналик Никита Дементьевга кичик ҳисобда ютқазиб, кумуш медалга сазовор бўлди. 

60 кг вазндаги курашчимиз Азизбек Йўлдошев бронза медали йўлидаги ўтиш беллашувида россиялик Абдулла Салимовга 0-7 ҳисобида ютқаза туриб, якунда "туше" баҳоси билан соф ғалабага эришди. Аммо, бронза медали учун баҳсда ютқазиб қўйди. 92 кг вазн тоифасидаги Жавлон Тиркашев эса бронза медали учун кечган беллашувда россиялик Тимур Чернишевга имкониятни бой берди.