Пара енгил атлетикачиларимиз Жаҳон чемпионатида биттадан олтин ва кумуш медалга эга чиқишди

Мусобақада иштирок этаётган Ўзбекистон терма жамоаси аъзолари яна 2 та медални қўлга киритишди.

25 ёшли Ёрқинбек Одилов F57 тоифасидаги найза улоқтириш беллашувларида кумуш медалга эга чиқди. Ҳамюртимиз ўз уринишлари доирасида 52.06 м натижа билан шахсий рекордини янгилаб, вице-чемпионга айланди.

Жаҳон чемпионати

Эркаклар ўртасида найза улоқтириш дастури (Ф57)

1. Муҳаммет Халванди (Туркия) - 53.30

2. Ёрқинбек Одилов (Ўзбекистон) - 52.06

3. Аманоллаҳ Папи (Эрон) - 51.55.

Энди Ёрқинбек ҳисобида Жаҳон чемпионатларининг 2 та медали мавжуд. У 2023-йилда Париж мезбонлигидаги дунё биринчилигида ҳам кумуш медални қўлга киритганди.

Аёллар ўртасида Т12 тоифасидаги узунликка сакраш беллашувларида иштирок этган Ўзбекистон терма жамоаси аъзоси Ёқутхон Холбекова эса 5.54 м натижа билан энг яхши бўлди ва барча рақибларини ортда қолдирган ҳолда мусобақа олтин медалига эга чиқди. Бу Холбекованинг жорий мавсумдаги энг яхши натижаси ҳисобланади.

Жаҳон чемпионати

Аёллар ўртасида узунликка сакраш дастури (Т12)

1. Ёқутхон Холбекова (Ўзбекистон) - 5.54

2. Лида Лоунела (Финландия) - 5.28

3. Ҳамри Линда (Жазоир) - 5.16.