Паркентда кураш ва белбоғли кураш бўйича Республика очиқ турнири ўтказилди

Паркент тумани ҳокимлиги, Паркент тумани прокуратураси, Ўзбекистон белбоғли кураш федерацияси, Тошкент вилояти кураш федерацияси ҳамда Паркент туман спорт мактаби ҳамкорлигида ўтказилган байрам сайли доирасидаги белбоғли кураш ва кураш беллашувларида мамлакатимизнинг деярли барча вилоятларидан 300 нафарга яқин спортчилар иштирок этишди. 

Полвонлар кураш бўйича 73, 81, 90, 100, +100 килограмм вазн тоифасида, белбоғли кураш бўйича эса 55, 60, 66, 73, 81, 90, +90 килограмм вазн тоифасида ўз имконият ва маҳоратларини намойиш этишди.

Эрталабдан бошланган саралаш баҳслари кураш ва белбоғли мусобақасини томоша қилишга ташриф буюрган мухлислар учун ҳақиқий спорт байрамига айланиб кетди.

Куннинг иккинчи ярмида турнирининг тантанали очилиш маросим ташкил этилди. Унда Паркент туман ҳокими Сардор Исоқулов, Осиё белбоғли кураш конфедрацияси президенти Мўмин Муратов, Олий мажлис қонунчилик палатаси депутати Зухра Миргазиева, Ўзбекистон белбоғли кураш федерацияси раиси Равшан Дастиров ва бошқалар иштирок этди. 

Маросимда сўз олганлар Давлатимиз раҳбари томонидан миллий спортимиз бўлган кураш ва белбоғли  курашни ривожлантиришга кўрсатилаётган амалий ёрдам ва эътиборни яна бир бор эьтироф этишди. 

Шундан кейин паркентлик бир қатор белбоғли кураш фидоийларига, фахрий полвонларга кўп йиллик самарали меҳнатлари учун Ўзбекистон спорт фахрийлари кенгаши раиси Баҳодир Махситов тамонидан “Ўзбекистон Республикаси спорт фахрийси” кўкрак нишони топширилди. 

Шунингдек, Ўзбекистон белбоғли кураш федерацияси раиси томонидан ҳам мазкур спорт турини ривожлантиришга қўшаётган ҳиссаси учун бир нечта спорт фидойиларига ташаккурнома ва эсдалик совғалари топширилди.  

Беллашувларининг ярим финал, финал босқич учрашувлари муросасиз ва қизиқарли лаҳзалари билан мухлисларга завқ ва шавқ бахшида этди. Кураш ва белбоғли кураш бўйича энг зўр, маҳоратли полвонлар ғолибликни қўлга киритди.

Белбоғли кураш ғолиблари: 

55 кг. Ортиқ Анборбоев (Тошкент в.) 

60 кг. Дониёр Абдураҳмонов (Паркент т) 

66 кг. Шерзод Элибоев (Бука т.)

73 кг. Камрон Намозбоев (Олмалиқ ш) 

81 кг. Диёр Шодмонов (Тошкент в) 

90 кг. Ҳусан Абдуҳакимов (Сирдарё в.) 

+90 кг. Бобур Тўхтасинов (Фарғона в.) 

Кураш ғолиблари: 

73 кг. Дилшод Бўриев

81 кг. Темур Жўраев

90 кг. Алихон  Нодиров

100 кг. Амирсаид Жиллаев

+100 кг. Ислом Носиров

Мусобақа сўнггида белбоғли кураш ва кураш бўйича ғолиб ва совриндорлар турнир ташкилотчилари томонидан медаль, диплом ва қимматбаҳо  совғалар билан тақдирланишди.

Илҳом РАҲМОНОВ тайёрлади