"Пахтакор" шов-шувли трансферларга қўл урди

Бунга қадар жамоа ўз таркибига ҳимоячи Акром Комилов, ярим ҳимоячи Сардор Собирхўжаевни қўшиб олганди. Шунингдек, клуб "Насаф" билан шартномаси тугаган кипер Санжар Қувватов билан ҳам оғзаки келишувга эришгани ҳақида хабар бергандик.

ОЧЛга тараддуд кўраётган "Пахтакор" клуби Ўзбекистон терма жамоасининг бир йўла икки нафар аъзоси саналган футболчиларни ўз сафига қўшиб олишга эришди.

Дастлабки харид тўғридан-тўғри рақиби ва рақобатдоши саналган "Локомотив" тўпурари Марат Бикмаев бўлди. "Темирйўлчилар" билан шартномаси тугаган ҳужумчига "шерлар" қизиқарли таклиф билан чиқишди ва ҳужумчини кўндира олишди. Бикмаев олдида Малайзиядан катта маошли таклиф бўлишига қарамасдан "Пахтакор" собиқ футболчиси ортга қайтаришга эришди.

Иккинчи трансфер биринчисиданда шов-шувлироқ бўлди. Ўзбекистон терма жамоаси вингери ва "Анжи" футболчиси саналган Достон Ҳамдамов ҳам "Пахтакор" билан келишувга эришди. Янги мавсумдан эътиборан Осиё Кубогида порлаган футболчи фаолиятини "Пахтакор"да давом эттиради.

Шунингдек, клуб шартномаси якунига етган икки нафар аъзоси Жалолиддин Машарипов ва Егор Кримец билан ҳам янги битим имзолади.