Poland Rapid & Blitz. Нодирбек Абдусатторов Магнус Карлсенга қарши ўйин ўтказди ФОТО + ЖАДВАЛ

Мукофот жамғармаси 175 000 АҚШ долларини ташкил этувчи ушбу мусобақада дунёнинг кучли 10 нафар гроссмейстери бош соврин учун баҳс олиб боряпти. Улар орасида дунё шахматчилар рейтингида 5-ўринни эгаллаб турган ҳамюртимиз Нодирбек Абдусатторов ҳам бор. 

Кеча турнирнинг икккинчи куни шахматчилар рапид йўналишида яна учта партияда ўзаро дона суришди. Рапид йўналишидаги баҳсларда ғалабага 2, дурангга 1 очко берилади. Эртага ўтказиладиган блиц йўналишида эса ғалабага 1, дурангга 0,5 очко тақдим этилади. Турнир ғолиби эса 40 000 долларга эга бўлади.   

Иштирокчилар: Магнус Карлсен (Норвегия, рапид 2828/блиц 2886), Вэй И (Хитой, 2758/2684), Ян-Кшиштоф Дуда (Польша, 2748/2766), Нодирбек Абдусатторов (Ўзбекистон, 2733/2661), Рамешбабу Прагнанандҳа (Ҳиндистон, 2704/2675), Аниш Гири (Нидерландия, 2687/2715), Аржун Эригайси (Ҳиндистон, 2671/2744), Доммараджу Гукеш (Ҳиндистон, 2649/2651), Винсент Каймер (Германия, 2647/2610), Кирилл Шевченко (Руминия, 2622/2546).

Мусобақанинг дастлабки куни Нодирбек Абдусатторов нидерландиялик Аниш Гири ва ҳиндистонлик Доммараджу Гукешни мағлуб этиб, яна бир ҳинд гроссмейстери Рамешбабу Прагнанандхага имкониятни бой бериб қўйганди. 

Нодирбек 4-турда германиялик Винсент Кеймер, 6-турда ҳиндистонлик Аржун Эригайси билан дурангга имзо чекди. Бешинчи турда эса қора доналарда жаҳон чемпиони, рейтинг пешқадами Магнус Карлсен билан тўқнаш келди ва бу сафар норвегиялик афсонага ютқазиб қўйди.    

Магнус Карлсен - Нодирбек Абдусатторов партияси

Олтинчи турдан сўнг турнир жадвалида Магнус Карлсен ва Вэй И 8 тадан очко билан қўшҳокимлик қилишяпти. Руминиялик Кирилл Шевченко ва Рамешбабу Прагнанандҳа ҳисобида 7 тадан очко бор. Абдусатторов, Гукеш ва Эригайиси 6 тадан очко билан кейинги ўринларни банд этишган. Бугун рапид йўналишида сўнгги 3 та партия ўйналади.