21 мар 15:18
Янгиликлар

От Спорти

Поло бўйича “Tashkent Open-2021” турнирининг ғолиби аниқ

Теглар : Поло

Пойтахтимиздаги “Пахтакор” футбол клубининг захира майдонида поло бўйича “Tashkent Open-2021” мусобақаси ўз якунига етди.

2 кун давом этган баҳслардан сўнг мусобақада ғолиб ва совриндор жамоалар номи аниқ бўлди.

Ғолиблик учун Қашқадарё вилоятидан “Koç Construction” ташкилоти номидан иштирок этган “Қорабайир отчилик мажмуаси” ва Бухоро вилоятидан келган “NEST ONE” жамоалари баҳс олиб боришди. Кескин ва муросасиз кечган курашда қашқадарёлик полочилар рақибларидан устун эканликларини кўрсатишди. Учинчи ўрин учун кечган баҳсда эса “Universal Jumping” полочилари Миллий Гвардия қўмондонлиги жамоасини мағлуб этди.

Мусобақанинг тақдирлаш маросимида Ўзбекистон Миллий олимпия қўмитаси раиси Рустам Шоабдураҳмонов, МОҚ Бош котиби Ойбек Касимов, Миллий гвардия қўмондонлиги, Ўзбекистон поло федерацияси, юртимизда фаолият олиб бораётган таниқли ишбилармонлар ва спорт жамоатчилиги вакиллари иштирок этиб, бу каби мусобақаларнинг ташкил этилиши юртимизда жисмоний тарбия ва спорт оммавийлиги йўлида муҳим аҳамият касб этишини таъкидлашди.